Pavlodar oblysynyń medıtsınalyq avtoparki 100%-ǵa jańartylady

PAVLODAR. QazAqparat - Óńirge jumys saparymen kelgen QR Densaýlyq saqtaý birinshi vıtse-mınıstri Marat Shoranov Aqsý medıtsınalyq mekemelerdi aralap shyqty, dep habarlaıdy Pavlodarnews.kz.

Aqsý qalalyq aýrýhanasynyń dırektory Maqsat Muqashev málim etkendeı, medıtsınalyq mekeme qurylymyna 180 oryndyq statsıonar, 500 oryndyq kópsalaly emhana, aýyldyq aımaqtaǵy jeti dárigerlik ambýlatorııa, bes feldsherlik-akýsherlik pýnkt pen 10 medpýnkt kiredi.

Aýrýhanada memlekettik-jekeshelik áriptestik jobalary júzege asyrylǵan. Sonyń alǵashqysy gemodıalız ortalyǵy bolsa, ekinshisi 2019 jyly kompıýterlik tomograf ornatý boıynsha joba.

Sáýleli dıagnostıka dárigeri Marına Anısımovanyń aıtýynsha, indet kezinde bolǵan úlken jaýapkershilikti sezingen medıkter jumysty zor qulshynyspen atqaryp shyqty.
Qalalyq aýrýhana personalymen tildesken Marat Shoranov koronavırýs pandemııasy kezindegi medıkter jumysyna erekshe nazar aýdardy.

- Pandemııa kezinde bizde jalpy sany 230 provızorlyq tósek oryn uıymdastyryldy, oryn tapshylyǵy bolǵan joq, - deıdi aýrýhana dırektory Maqsat Muqashev. - Barlyǵy 922 adam emdelip shyqty. Provızorlyq gospıtalderde 98 medık jumys istedi.

Qazirgi kezde jaǵdaı turaqty. Jedel respıratorly aýrýlar men pnevmonııamen aýyratyndar sany kúrt azaıdy. Osy sebepti provızorlyq oryndar ýaqytsha jabyldy.

QR densaýlyq saqtaý vıtse-mınıstri shalǵaıdaǵy aýyldarda sapaly medqyzmet kórsetý máselesine de erekshe toqtaldy.
- Bizge el Prezıdenti ásirese aýyldyq jerde ınfraqurylymdy damytýdy tapsyrǵan edi, - deıdi Marat Shoranov. - Sol sebepti jańa nysandar salýǵa degen qajettilikti anyqtaý maqsatynda qolda bar ınfraqurylymnyń aýdıtin ótkizý kerek. Bul jumysty qarasha aıyna deıin aıaqtaımyz.

Marat Shoranov jaqyn arada oblysqa jeti jańa jyljymaly medıtsınalyq keshender keletinin atap ótti. Odan basqa qarasha aıyna deıin óńirge 109 sý jańa otandyq jedel járdem mashınasy tapsyrylatyndyǵy belgili boldy.

Kezdesý sońynda QR Densaýlyq saqtaý vıtse-mınıstri sanıtarlyq-epıdemıologııalyq erejelerdi saqtaý qajettiligin qadap aıtty. «Maskalyq rejım men áleýmettik ara qashyqtyq saqtalmasa, ınfektsııa ári qaraı taraı beredi», - dedi Marat Shoranov.