Pavlodar oblysynyń maıdangerleri 1 mıllıon teńgeden aldy
Jeńis kúni qarsańynda Pavlodar oblysynda turatyn soǵys ardagerlerine mıllıon teńgeden berildi. Jalpy, 9 mamyrǵa deıin oblysta maıdangerlerge jáne taǵy 11 sanattaǵy azamattarǵa berilý úshin 300 mıllıon teńgeden astam qarjy bólindi.
«Meniń ákem Grıgorıı Fedorovıch Ivanchenko 1924 jyly 10 aqpanda dúnıege kelgen. Ákem 1942 jyly Ýspen aýylynan shaqyryldy. Kýshka qalasynda áskerı boryshyn ótep, sodan keıin 1943 jyly segizinshi gvardııalyq áýe-desanttyq brıgadasyna enip, Máskeý mańynda shaıqasty. 1944 jyly Japonııamen Ekinshi Qıyr Shyǵys maıdanynda soǵysty. 2-dárejeli Uly Otan soǵysy ordenimen, «Japonııany jeńgeni úshin» medalimen marapattalǵan. 1950 jyly áskerden qaıtaryldy. Beıbit ýaqytta ol Pavlodar áýejaıynda aǵa ınjener bolyp jumys istedi. Jumys ótili - 57 jyl. Ul men qyzyn tárbıelep ósirdi, qazir onyń tórt nemeresi bar. Biz batyr ákelerimiz ben atalarymyzdyń erlikterin umytpaǵany úshin memleketke rızamyz», - deıdi maıdangerdiń uly Vladımır Ivanchenko.
Qazir Ertis óńirinde kózi tiri 55 maıdanger qaldy. Soǵys ardagerleriniń eń jasy úlkeni – Sharbaqty aýdanynda turatyn 95 jastaǵy Mıhaıl Illarıonovıch Kovtýn.
Ekinshi dúnıejúzilik soǵystyń eń jas ardageri Mıhaıl Mıhaılovıch Mılvanov jaqynda 91 jasqa tolady. Ol soǵystyń alǵashqy kúnderinen bastap ekinshi Stalındik brıgadasynyń «Otan úshin» atty partızan tobyna qosyldy. Ol pýlemetshi bolyp bekitilgen. Partızandyq toppen birge barlaý júrgizdi, baılanys ornatty jáne kóptegen basqa operatsııalardy júzege asyrdy. Ýkraına azat etilgennen keıin top taratyldy. 1947 jyly áskerden qaıtarylǵannan keıin Mıhaıl Mıhaılovıch Lvovtaǵy №1 temirjol ýchılışesine túsip, onda parovoz ınjeneriniń kómekshisi mamandyǵyn aldy. 1954 jyly joldar mınıstrliginiń buıryǵymen Qaraǵandy temir jolyna, sol jerden 47 jyl jumys istegen Pavlodar lokomotıv deposyna jiberildi. 1984 jyly zeınet demalysyna shyqty. Jeńis kúniniń 75 jyldyǵy qarsańynda Mıhaıl Mılvanov týǵan kúnimen quttyqtaýlardy qabyldaýda.
Pavlodar oblysynda Ekinshi dúnıejúzilik soǵys ardagerleri men múgedekterinen basqa, azamattardyń taǵy 11 sanaty kepildendirilgen qarjylaı kómek alýǵa quqyly. Tyl eńbekkerleri men olarǵa teńestirilgenderge usynylatyn tólemder – 30 myńnan 100 myń teńge kóleminde. Bul sanattaǵylardyń basym bóligin tyl eńbekkerleri quraıdy. Olardyń sany – 6998. Keńes Odaǵynda ásker qatarynda qyzmet atqarǵan qatysýshylar (tórt adam) - 100 myń teńge, Lenıngrad qalasynda qorshaýda bolǵan alty adamǵa – 60 myń, Chernobyl atom-elektr stantsııasynda qaza tapqan azamattardyń 21 otbasyna – 30 myń teńge jáne beıbit ýaqytta áskerı qyzmetin ótkerý kezinde qaza tapqan 46 áskerı qyzmetshilerdiń otbasyna – 10 AEK mólsherde tólemaqy qarastyrylǵan. Bul soma 1 sáýirden bastap 27780 teńgege teńestirilgen. Keńes Odaǵy kezinde Keńes áskerinde jáne basqa da memleketterde qyzmet atqarǵan 673 adamǵa – 50 myń teńge, fashıstik kontslagerlerdiń 24 burynǵy kámeletke tolmaǵan tutqynyna – 100 myń teńge, soǵys kezinde múgedek bolǵan azamattardyń áıelderi men kúıeýlerine, partızandarǵa (262 adam) – 30 myń teńge, tyl eńbekkerlerine - 30 myń (6998), soǵys jyldary áskerı qyzmetin atqarý kezinde múgedek bolǵan azamattar - 100 myń (12 azamatqa), Keńes Odaǵynda UOS tusynda jumys istegen 214 adamǵa – 30 myń teńge kóleminde jáne Chernobyl atom-elektr stantsııasyna qatysýshylarǵa ( 260) 50 myń teńge aýdarylady. Áskerı qyzmet atqarǵanda múgedek bolǵan 12 adam 100 myń teńge alady.
