Pavlodar oblysynyń qoǵamdyq kólikterinde sanıtarlyq talaptar buzylyp otyr
PAVLODAR. QazAqparat – Óńir turǵyndary qoǵamdyq kólik ishinde áleýmettik qashyqtyqty saqtamaı, maskalardy durys taqpaı júr, dep habarlaıdy QazAqparat.
«Pavlodar oblysynyń qoǵamdyq kólikterinde sanıtarlyq talaptardy buzý tirkelgen: munda áleýmettik araqashyqtyq saqtalmaıdy (avtobýs, baǵdarly taksı adamdarǵa toly), maska taǵý rejımi buzylǵan (maskalar durys emes taǵylýda nemese múldem maskasyz júrgender bar). Bul turǵyndar arasynda koronavırýs ınfektsııasynyń taralýyna áser etip, aımaqtaǵy epıdemıologııalyq jaǵdaıdyń nasharlaýyna soqtyrady», - dep habarlady Pavlodar oblystyq sanıtarlyq-epıdemıologııalyq departamentinen.
Óńir epıdemıologtary koronavırýsqa qarsy ekpe saldyrtý kópshilik oryndarda maska taǵý rejımin joqqa shyǵarmaıtynyn atap ótti. Adamda COVID-19 vırýsyna qarsy vaktsınalaýdan keıin ımmýnıtet shamamen 32–45 kúnnen keıin, eń kóbi – 56 kúnnen keıin qalyptasady.
Sanıtarlyq-epıdemııaǵa qarsy, sanıtarlyq-aldyn alý is-sharalaryn uıymdastyrý úshin Pavlodar oblysy Bas sanıtarlyq dárigeriniń 24 mamyrdaǵy qýlysy boıynsha ǵımarattar men ashyq aýada medıtsınalyq nemese matadan tigilgen maskalardy mindetti túrde taǵý qarastyrylǵan.
«Bul talaptardy barlyq jeke jáne zańdy tulǵalar oryndaýy tıis. Buzýshylyq faktileri anyqtalǵan jaǵdaıda, QR aǵymdaǵy zańnamasyna sáıkes tıisti sharalar qoldanylady. Sizderden azamattyq estııarlyq tanytyp, arnaıy shekteý sharalaryn ustanýdy suraımyz», - dep qosyp ótti departamentten.
