Pavlodar oblysynyń eks-ákimi Ekibastuz turǵyndarynan keshirim surady
«Qurmetti jerlester! Men úshin sizderge qyzmet etý asa zor qurmet boldy. Máselelerdi sheshýdi basty basymdyq ete otyryp, barlyǵyn árqashan da shynaıy jáne adal oryndadym. Jyldar boıy jınalǵan máselelerdiń biraz bóligi sheshildi, qalǵandaryn sheshýge ýaqyt kóbirek qajet boldy. Ekibastuzdaǵy tótenshe jaǵdaı dál sol – uzaq ýaqyt boıy jınalyp kelgen jáne tez sheshilmeıtin problema.⠀
Degenmen, qadirli Ekibastuz turǵyndary, qalyptasqan jaǵdaı úshin óz jaýapkershiligimniń de bar ekenin bilemin jáne sizderden shyn júrekten keshirim suraımyn! Osy kúnderi meniń barlyq oıym men ýaıymym sizder týraly boldy jáne solaı bolyp qala beredi. Sizderge qaırattylyq, al mamandar men áriptesterime máseleniń jedel sheshilýin tileımin», - dep jazdy Á.Sqaqov áleýmettik jelidegi paraqshasynda.
Buǵan deıin habarlaǵanymyzdaı, QR Prezıdenti Qasym-Jomart Toqaev búgin Ábilqaıyr Sqaqovty Pavlodar oblysynyń ákimi qyzmetinen bosatty. Onyń ornyna ýaqytsha Oleg Krýk taǵaıyndaldy.
Eske salaıyq, 27 qarashada Ekibastuz jylý elektr ortalyǵynda apat bolyp, qala turǵyndary jylýsyz qaldy.
Keıinirek jylý qazandyǵynyń isten shyǵýyna baılanysty oblys ákimi bastaǵan jedel shtab quryldy.
Ekibastuz qalasynyń oqýshylary onlaın oqýǵa kóshirildi.
28 qarasha kúni tańerteń qalada jergilikti aýqymdaǵy tótenshe jaǵdaı jarııalandy.
30 qarashada Ekibastuzǵa Premer-Mınıstr Álıhan Smaıylov baryp, kináliler jaýapqa tartylatynyn aıtty. Apat sebebi retinde jylý jelileriniń tozýy, jylý ortalyǵy basshylyǵy tarapynan nemquraıdylyq pen ınvestıtsııalardyń jetkiliksizdigi ataldy.Búgin tańerteń berilgen málimetke sáıkes, 17 kópqabatty turǵyn úı ortalyq jylý jelisine áli qosylǵan joq. Onymen qosa, 58 turǵyn úı sýdan ajyratyldy.