Pavlodar oblysynyń eki aýdanynda karantın shekteýi kúsheıtildi
PAVLODAR. QazAqparat – Pavlodar oblysynyń Maı jáne Ertis aýdandarynda jańa karantın shekteýi engizildi, dep habarlaıdy QazAqparat Pavlodarnews.kz-ke silteme jasap.
Ertis aýdany ákimdiginiń málimdeýinshe, memlekettik uıymdar men kásiporyndar saǵat 9:00-den 16:00-ge deıin jumys isteıdi. Aýdannyń 10 mektebi, qosymsha bilim berý mekemeleri qashyqtyqtan oqytýǵa kóshirildi. Aýdan ortalyǵyndaǵy balabaqsha jumysyn toqtatty. Aýylishilik joldarda qoǵamdyq kólik júrisi shekteldi. Monsha, saýna, dinı jáne sporttyq nysandar eki aptaǵa jabylady.
Jyl basynan beri Ertis aýdanynda koronavırýs ınfektsııasynyń 83 jańa jaǵdaıy tirkeldi. Onyń ishinde 5 bala bar. KVI juqtyrǵandarmen baılanysta bolǵandar sany – 157.
Sondaı-aq, Maı aýdanynyń Kóktóbe jáne Keńtúbek aýyldarynda 2 aptalyq jańa karantın shekteý sharalary engizildi. Atalǵan aýyldarda sanıtarlyq beketter ornatylyp, saǵat 7:00-den 20:00-ge deıin qozǵalys , sonyń ishinde jaıaý júrý de shekteledi.
Aýyl ákimderi men aýdannyń polıtsııa bólimine betperde taǵý rejımi men áleýmettik qashyq, karantın erejesiniń saqtalýyn baqylaý, jasyryn túrde ótetin otbasy basqosýyn anyqtaý jáne olarǵa jol bermeý tapsyryldy.
