Pavlodar oblysynyń birinshi synyp oqýshylary 11000-nan asa kóshet otyrǵyzady
PAVLODAR. QazAqparat - Pavlodar oblysynyń bilim basqarmasy «Bolashaq baǵy» kúzgi kóshet otyrǵyzý aktsııasyn uıymdastyrmaq.
Atalmysh shara Pavlodar oblysynyń ákimi Bolat Baqaýovtyń bastamasymen óńirde jarııalanǵan «Ekologııa jyly» aıasyndaǵy jumystardy jáne «Rýhanı jańǵyrý» baǵdarlamasyn iske asyrý maqsatynda uıymdastyrylmaq. Bul týraly Pavlodar oblystyq bilim basqarmasy habarlady.
Basqarma málimetterine qaraǵanda, búgin 1-synyp oqýshylary ata-analarymen birlesip, oblystyń barlyq mektep aýmaqtarynda jalpy sany 11000-nan asa qylqan japyraqty jáne basqa da kóshetterdi otyrǵyzady.
Atalǵan is-sharanyń negizgi maqsaty oqýshylardyń, ata-analardyń, pedagogıkalyq ujymnyń birlesken eńbegi arqyly ekologııalyq mádenıet qalyptastyrý bolyp tabylady.
Basqarma ókilderiniń aıtýynsha, mundaı sharanyń mańyzy zor. Óıtkeni oýshy 11 jyl boıy óziniń aǵashyn kútip ustap, onyń ósip-ónýine múmkindik jasaıdy. Óskende aǵash onyń oqýshy kezindegi ómiriniń eskertkishi bolyp qalady. Balalar ózderiniń qorshaǵan ortaǵa qanshalyqty úles qosqandyǵyn maqtanyshpen aıtyp júredi.
Atalǵan is-shara aldaǵy ýaqytta jyl saıyn dástúrli túrde ótkiziletin bolady.
Osyǵan deıin Pavlodar oblysynda 8-shi synyp oqýshysynyń «Aqyldy jylyjaı» oılap tapqandyǵyn jazdyq.
