Pavlodar oblysynyń basshysy jergilikti ákimderdiń jumysyn synǵa aldy
PAVLODAR. QazAqparat - Pavlodar oblystyq ákimdiginde qalalar men aýdandar ákimderimen óńir basshysynyń jasasqan memorandýmdaryn oryndaý boıynsha jyldyń aldyn ala qorytyndysy talqylandy, dep habarlady oblys ákimniń baspasóz qyzmetine silteme jasap «QazAqparat» HAA tilshisi.
Belgilengen josparlardy oryndaýda artta qalǵan Lebıaji aýdany. Onyń basshysy Serik Janǵazınov jyldyń aıaǵyna deıin 14 ındıkatordyń 4-eýi oryndalýy neǵaıbyl ekenin málim etti. Al turǵyn úıdi paıdalanýǵa berý jaıly aıtsaq, jospar 5,5 myń sharshy metr bolsa, aýdan 3,7 sharshy metrdi ǵana paıdalanýǵa berýdi josparlaýda.
Ótkizip alǵan ýaqyttyń ornyn toltyrýǵa tyrysyp, Aqsý aýylynda aıaz ben qarǵa qaramastan, 24 páterlik jataqhana salý jalǵasýda. Qurylysshylar men aýdan basshysy jyl aıaǵyna deıin ǵımaratty paıdalanýǵa berýge ýáde etip otyr.
«Bul jataqhanany shynymen salyp bitiremiz dep oılaısyzdar ma? - dep kúmándandy oblys ákimi Bolat Baqaýov. - Men sizderge tamyzda sozbaý qajettigin eskertkenmin. Al qyrkúıek pen qazanda aıazdyń bastalǵanyn kútkendeı «demaldyńdar». Men qurylys normalaryn, qystyń ne ekenin jaqsy bilemin, sondyqtan jyl sońyna deıin aıaqtaımyz degenderińe senbeımin», - dep sózin túıindedi óńir basshysy.
Qala basshysy Nurlan Dúısenbınov josparlanǵan 70 mlrd teńge bolsa, qala 56 mlrd kapıtal salymy kólemine qol jetkizetinin atap ótti. Bıýdjetke salyqtyq jáne salyqtyq emes túsimderdiń ósimi boıynsha ındıkatorǵa qol jetkizilmeýi múmkin. Eki jaǵdaıda da Aqsý ákimi «Aqsý ferroqorytpa zaýyty» AQ men «Eýrazııalyq energetıkalyq korporatsııa» AQ-ǵa baılanysty problemalarǵa shaǵymdandy.
«Eki qala quraıtyn kásiporynǵa shúıilip qaldyńdar, basqa bıznespen jumys jasamaısyńdar, - dedi Bolat Baqaýov. - Bul baǵytta jumys aqsap tur. Munyń bári senderdiń shıkilikteriń dep sanaımyn».
Budan basqa, óńir basshysynda Ekibastuz, Jelezınsk, Ýspenskıı aýdandary ákimderiniń jumysyna talaptary boldy. Kezdesý sońynda ol kelesi májiliste qalalar men aýdandar ákimderi jumysynyń sońǵy qorytyndylary qaralatynyn habarlady.
