Pavlodar oblysynyń aýyldarynda ákimder saılaýy ótedi
PAVLODAR. QazAqparat – 28 tamyzda Pavlodar oblysynda aýyldyq okrýg ákimderiniń saılaýy ótedi, dep habarlaıdy QazAqparat tilshisi Pavlodarnews.kz saıtyna silteme jasap.
Saılaý arqyly Aqsýǵa qarasty Qyzyljar aýyldyq okrýginiń ákimi tańdalady. Saılaý komıssııasynyń aqparaty boıynsha, okrýg quramyna bes eldi meken kiredi. Ondaǵy halyq sany — 3623 adam. Sonyń 1699-y saılaýǵa qatysady dep kútilýde. Turǵyndar Qyzyljar jáne Saryshyǵanaq aýyldarynda ornalasqan № 495 jáne №500 ýchaskelerinde daýys beredi.
Saılaýǵa AMANAT partııasynyń atynan qalalyq tótenshe jaǵdaılar basqarmasynyń azamattyq qorǵanys bóliminiń basshysy Ábildınov Dáýlet Jumabaıuly qatysyp otyr.
Taǵy eki úmitker ózin-ózi usynǵan. Onyń biri – Aqsý qalasynyń turǵyn úı-kommýnaldyq sharýashylyǵy basqarmasy bóliminiń basshysy Baımanov Qanatbek Qaırollauly. Al ózin-ózi usynǵan ekinshi kandıdat — qalalyq Halyqty jumyspen qamtý ortalyǵy bólim basshysynyń orynbasary Ermekova Ásemgúl Qanatqyzy.
Sonymen qatar, Efremov aýyldyq okrýginde ákim saılaýy ótedi. Saılaýshylar Efremov mektebiniń ǵımaratynda ornalasqan ýchaskede daýys bere alady. Degenmen munda ázirge úmitkerler tirkelgen joq. Sol sııaqty Baıanaýyl jáne Kúrkeli aýyldarynda da ákim saılaýy ótedi.
Eske sala ketsek, buǵan deıin Memlekettik keńesshi Erlan Qarın byltyrdan beri 1093 eldi mekenniń ákimi saılanǵanyn málimdegen edi.
Foto: pavlodarnews.kz
