Pavlodar oblysynyń aýyl jastary jalǵyzbasty zeınetkerge úı salyp berdi
«66 jastaǵy Gúlnash apamyz jalǵyz turady. Esilbaı aýylynda úıi bolǵan edi. Ótken jyly bir bólmesiniń shatyry túsip ketken jáne jóndeýge kelmeıdi. Ol ózi eshkimnen kómek surap, júgingen emes. Zeınetkerge aýyl jastary ózderi úı salyp berýge nıet bildirdi. Bastapqyda apamyz uıalyp, bas tartqan bolatyn. Birligi jarasqan jastar qysqa ýaqyttyń ishinde baspana turǵyzyp berdi. Osy aptanyń aıaǵynda esigin salyp, aqtaý jumystaryn aıaqtaıdy», - deıdi Sharbaqty aýdany ishki saıasat jáne tilderdi damytý bóliminiń basshysy Serjan Imanqulov.
Saýaby mol ıgi iske bilek túrip, jumyla kirisken 30 shaqty adam qurylys materıaldary men kerek-jaraq satyp alǵan. Buǵan qosa, zeınetkerge jaıly jaǵdaı jasaý úshin tońazytqysh, gaz plıtasy jáne kir jýatyn mashına sııaqty turmystyq tehnıkalardy satyp alyp bermek.
«Eki jyldan beri turyp jatqan áke-sheshemniń úıiniń tóbesine jóndeý jumystaryn júrgizý kerek bolatyn. Men eshkimge salmaq salyp, kómek suraǵym kelmedi. Árkimniń óz otbasy men jumysy bar. Biraq jastardyń ózderi qolqa salyp, kómek kórsetýge nıet bildirgen soń meselin qaıtarǵym kelmedi. Aýlanyń ishinen úı salyp, elektr symdaryn tartty, qurylysty aıaqtaýǵa taıap qaldy. Qurban aıt merekesinde de nazardan tys qaldyrmaı, kómek kórsetip turady. Olardyń bul isterine rızashylyǵymdy bildiremin. Alla razy bolsyn! Ózgelerge jasaǵan jaqsylyqtary ózderine eselenip qaıtsyn», - deıdi zeınetker.
