Pavlodar oblysynyń aýrýhanalarynda tarıfter teńestirildi
ASTANA. QazAqparat - Pavlodar oblystyq densaýlyq saqtaý basqarmasy oblystyń barlyq medıtsınalyq mekemeleriniń baǵalary jáne qyzmet tarıfteriniń ósý sebepteri kórsetilgen ortaq baǵa preıskýrantyn ázirledi, dep habarlaıdy pavlodarnews.kz.
Bul týraly memlekettik qyzmet isteri jáne sybaılas jemqorlyqqa qarsy is-qımyl agenttiginiń Pavlodar oblysy boıynsha departamentinen málim etti.
Eske sala keteıik, atalmysh vedomstvo «jasyryn satyp alýshy» ádisimen qoǵamdyq baqylaý jáne azamattar arasynda saýalnama júrgizý barysynda oblys ortalyǵynda densaýlyq saqtaý uıymdarynyń qyzmetterinde birqatar buzýshylyqtar anyqtaǵan bolatyn. Budan keıin departament tarıfterdi teńestirý jóninde usynys jasaǵan. - Mysaly, oblystyq aýrýhanada kardıolog keńesiniń baǵasy 2000 teńgeni quraıdy, - dedi vedomstvoda. - Bul oblystyq kardıologııalyq ortalyqtyń baǵasynan (1500 teńge) 500 teńgege nemese 25%-ǵa joǵary. Osyǵan uqsas jaǵdaı oblystyq aýrýhanadaǵy oftalmolog, terapevt, akýsher-gınekolog jáne konsýltatıvtik qabyldaý qyzmetterinde oryn alǵan. Sondaı-aq óńir aýrýhanalarynyń 20 mamany baǵany kótergeni anyqtaldy.
Osy jaǵdaılardan keıin departamenttiń usynysy boıynsha ázirlengen preıskýrantta aımaqtaǵy barlyq medıtsınalyq uıymdardaǵy baǵa men tarıftiń ósý sebebi kórsetilgen. Endi oblystyń barlyq emdeý mekemelerinde kardıologtyń keńes berýi 1800 teńge turady.
Emhanalardyń jumysshylary memlekettik qyzmet kórsetý barysynda memlekettik standart talaptaryn buzǵan. Máselen, medıtsınalyq uıymdarǵa tirkelý qyzmetin kórsetýden bas tartqan ІІ toptaǵy múgedektiń quqyqtary buzylǵan. № 5 emhanasynda ýrolog-dáriger dúısenbiden beısenbige deıin saǵat 14.30 - 16.00-de naýqastardy «jandy kezekte» qabyldap, dárigerdiń qabyldaýyna jazylý júrgizilmegen.
Alaıda memlekettik standartqa sáıkes, dárigerdiń qabyldaýyna veb-portal, telefon jáne tikeleı ótinish arqyly jazylýǵa bolady. Osyǵan baılanysty densaýlyq saqtaý uıymdarynda halyqtyń áleýmettik álsiz toptary úshin jaǵdaılar jasalǵan. Onyń ishinde UOS ardagerleri men I jáne II toptaǵy múgedekterge jeńildetilgen qyzmetter boıynsha aqparattyq kesteler jarııalandy. Sondaı-aq ІІ toptaǵy múgedektiń quqyqtary qorǵaldy.
