Pavlodar oblysynyń Aqsý qalasynda jylý qazandyǵy qoldanysqa beriledi
NUR-SULTAN. QazAqparat – Bıyl Pavlodar oblysynyń Aqsý qalasynda qalany ortalyqtandyrylǵan jylýmen qamtamasyz etetin qazandyq paıdalanýǵa beriledi, dep habarlaıdy QazAqparat tilshisi.
Bul týraly oblys ákimi Ábilqaıyr Sqaqov ortalyq kommýnıkatsııalar qyzmetinde ótken brıfıngide aıtty.
«Aqsý qalasynda bıyl qalany ortalyq jylýmen qamtamasyz etetin jylý qazandyǵy paıdalanýǵa beriledi. Sondaı-aq, muz arenasynyń qurylysy men «Zamanaýı mektep» óńirlik baǵdarlamasy boıynsha mektepterdi jańǵyrtý jumystary bastaldy. Bıyl oblystyń 56 mektebi jóndeýden jáne jańǵyrtýdan ótedi. Jumys istep turǵan eki mektepke qosymsha korpýs jalǵanyp, jańadan eki mektep salynady», - dedi aımaq basshysy.
Ákimniń aıtýynsha, jyl aıaǵyna deıin oblys aýmaǵynda 150 qurylys jáne abattandyrý jobasy iske asyrylmaq.
«Olardyń jartysyna jýyǵy «Aýyl – el besigi» baǵdarlamasy boıynsha júzege asady. Biz aýyl turǵyndaryn sapaly aýyz sýǵa qol jetkizýmen qamtamasyz etý jónindegi josparlardy jedeldetip, máseleni 2023 jyly tolyq sheshýge nıettimiz. Osy jyldyń qorytyndysy boıynsha 212 myń adam nemese óńirdegi aýyl turǵyndarynyń 95%-y sapaly aýyz sýǵa qol jetkizedi», - dedi oblys ákimi.
Ábilqaıyr Sqaqov oblys ekonomıkasyn agroónerkásip kesheniniń áleýeti esebinen ártaraptandyrý jospary bar ekenin málim etti.
«Osy saladaǵy ınvestıtsııalyq jobalar pýlynda 2025 jylǵa deıin 230 mlrd teńgeniń 46 jobasy tur. Onyń jartysynan kóbi osy jylǵa tıesili. Atap aıtqanda, 6 taýarly-sút fermasyn iske qosý josparlanýda. Bul súttiń ónerkásiptik óndirisin 19 myń myń tonnaǵa nemese 5%-ǵa arttyrýy tıis», - dedi ákim.
Oblys basshysy bıyl óńirde egis alańy 6%-ǵa ósip, 1,5 mln gektardan asqanyn atady. Ásirese kúnbaǵys jáne qaraqumyq daqyldarynyń alqaby ulǵaıtylǵan. Sondaı-aq, ol Pavlodar oblysynda egilgen 42 myń gektar qaraqumyq alqaby Qazaqstan boıynsha jalpy qaraqumyqtyń egistiginiń 44%-yn quraıtynyn atady.
