Pavlodar oblysynyń ákimi jóndeýden ótken joldardyń saqtalýyna alańdaýly
PAVLODAR. QazAqparat - Oblystyq ákimdikte ótken apparattyq jıynda Bolat Baqaýov kómir, usaq tas jáne ózge de bólinetin zattardy úlken kólemde tasymaldaýǵa tyıym salýdy tapsyrdy, dep habarlaıdy pavlodarnews.kz.
Óńirdegi joldardyń saqtalý máselesin oblys basshysy kópten beri nazarda ustaýda. 2018 jyly jol jóndeý jáne kógaldandyrý jumystaryna 12,4 mlrd teńge qarjy jumsaldy. Búgingi tańda jóndeýden keıin paıdalanýǵa berilgen joldarmen artyq salmaǵy bar júk kólikteri júretini belgili boldy. Olar artyq salmaq tasymaldaýǵa 6 aıǵa ruqsat beretin kólik ınspektsııasynan arnaıy anyqtama alatyn bolyp shyqty. Júktiń bólinetin nemese bólinbeıtindigine nazar aýdarylmaıdy. Anyqtamanyń quny 58 myń teńgeni quraıdy.
«Jaqynda ǵana Shaldaı - Vostochnyı tas jolymen júrip óttim. Jóndeýden ótkenine eki jyl ǵana bolsa da, jaǵdaıy nasharlaǵan. Bundaıǵa jol bermes úshin bólinetin zattardy artyq salmaqpen tasymaldaýǵa tyıym salynýy kerek. Artyq salmaq tasymaldaýshylar óte arzanǵa ruqsat qaǵazyn alyp, mıllıondaǵan teńgege shyǵyn keltiredi»,- dedi Bolat Baqaýov.
Oǵan qosa, óńir basshysy razrez, kenish sııaqty júkti jiberýshilerdiń júkti tıeý kezinde quqyq buzýshylyqtarǵa jol bermeýin qadaǵalaýdy jáne júk jiberýshilerdi artyq salmaqqa jaýapty qylýdy tapsyrdy.
Aıta keteıik, Pavlodarda artyq júkti jaqsyraq baqylaý úshin 100 mln teńgege úsh arnaıy jabdyqtalǵan kólik satyp alyndy. Olar jýyrda Pavlodarǵa jetkiziledi. Onyń biri kóbinese usaq tas tasymaldanatyn Maıqaıyń men Qalqaman arasyndaǵy tas jolǵa baqylaý júrgizedi.
