Pavlodar oblysynyń ákimi JEO-nyń jylý maýsymyna daıyndyǵyn tekserdi

PAVLODAR. QazAqparat - Oblystaǵy barlyq elektr stantsııalary 15 qyrkúıekten bastap jylý berýge daıyn, dep habarlaıdy pavlodarnews.kz.

Aımaq basshysy Aqsýdaǵy ferroqorytpa zaýyty aýmaǵyndaǵy aýdandyq jylytý qazandyǵynda jáne «EEK» AQ stantsııasynda boldy. Pavlodarda ákim qaladaǵy barlyq jylý elektr ortalyqtaryn aralady. - Birde-bir stantsııada másele joq, - dedi Bolat Baqaýov. – Aqsý jáne Pavlodar stantsııalary 15 qyrkúıekten bastap jylý berýdi bastaýǵa daıyn. Búginde ystyq sý boıynsha máseleler bar. Olardy on kún ishinde joıý josparlanǵan.

Jumys saparynyń qorytyndysyndaǵy jıynda «Pavlodar jylý jelileri» JShS ókilderi jóndeý naýqanynyń barysy týraly baıandady. Kúrdeli jóndeý josparlanǵan 9,2 shaqyrymdyq qubyrdyń 8 shaqyrymy tapsyrylǵan. Synaqtarǵa keletin bolsaq, synaq ótkennen keıin jeliden 150 aqaý shyqqan. - Kóptegen aqaýlarǵa baılanysty biz magıstraldyq jelilerde barlyq derlik jumystardy aıaqtaǵanymyzben, kúrdeli jóndeý boıynsha keshigýdemiz, - dedi «Pavlodar jylý jelileri» JShS basshysy Marat Imanaev. - Jylytý maýsymy bastalmas buryn bárin jasaımyz. Belgili bolǵandaı, sońǵy birneshe jylda kommýnalshylarda jelilerdi jetildirgennen keıin asfalt tósegen merdigerlerge qatysty máseleler bolǵan. Qazir kompanııa jol tehnıkasyn satyp alyp, shaǵyn ýchaskelerde óz kúshterimen asfalt tóseýde. Aımaq basshysy joldy jóndeý jumystaryn jyly ýaqytta júrgizýdi talap etti. Ol qysta jelini jóndeý jumysy júrgizilgen barlyq joldar qalpyna keltirilýi kerektigin qadaı aıtty.