Pavlodar oblysynyń ákimi úzdik tórt bilim ordasyna 50 mln teńgeden grant tabystady
PAVLODAR. QazAqparat - Pavlodarda búgin Estaı atyndaǵy qalalyq mádenıet saraıynda «Qazaqstannyń jańǵyrýy 3.0 - bilimniń úlesi» taqyrybynda ótken pedagog qyzmetkerlerdiń oblystyq konferentsııasynda alǵash ret úzdik tórt bilim ordasyna oblys ákiminiń granty tabystaldy.
Ustazdar qaýymyn jańa oqý jylynyń bastalýymen oblys ákimi Bolat Baqaýov quttyqtap, sáttilik tiledi, dep habarlaıdy pavlodarnews.kz .
«Tamyz keńesi urpaq tárbıesine qatysty máseleler ortaǵa salynyp, mańyzdy josparlar talqylanatyn jıyn», - dedi óńir basshysy. «Adam tárbıeleý - uly mindet. Osy uly mindetti júzege asyryp jatqan ustazdar qaýymy kez kelgen qurmetke laıyqty jandar. Sondyqtan jas urpaqqa bilim men tárbıe berip jatqan ustazdar qaýymyna sheksiz alǵys bildiremin. Bıyl jyldaǵy dástúr boıynsha avtokólik kiltterin tabys etýden bas tartyp, birneshe jyl boıy joǵary nátıje kórsetken tórt mektepke 50 mıllıon teńge kóleminde oblys ákimi grantyn taǵaıyndaý týraly birlesken sheshim qabyldandy. Mundaı marapatqa Pavlodar qalasynyń № 122 mektepke deıingi gımnazııasy, oblystyq «Jas daryn» mamandandyrylǵan mektebi, Aqsý qalasynyń Evgenev aýyldyq okrýginiń Úshterek orta mektebi jáne B.Ahmetov atyndaǵy Pavlodar pedagogıkalyq kolledji laıyq dep tanyldy».
Aımaq basshysynyń aıtýynsha, oblysta bilim berý júıesin qarjylandyrý jyl saıyn artyp keledi. 2015 jyly bul soma 45 mıllıard teńge bolsa, 2017 jyly 60 mıllıard teńgeni qurady. Jańa oqý jyly qarsańynda 118 bilim berý nysanynda 2 mıllıard teńge somaǵa kúrdeli jóndeý jumystary júrgizilgen. (ERG) Eýrazııalyq top pen Ortalyq Azııa elektr energetıkalyq korporatsııasynyń qoldaýymen Pavlodar tústi metallýrgııa kolledji jáne Pavlodar montaj kolledjiniń janynda jataqhanalar boı kóterýde. Tústi metallýrgııa kolledjiniń qasyndaǵy jataqhanany ashý jańa oqý jyly qarsańyna josparlanyp otyr. Sonymen qatar Baıanaýyl aýdany Maıqaıyń kentinde 110 oryndyq balabaqshanyń qurylysy júrgizilýde. Aqsý qalasy M. Omarov aýyldyq okrýgindegi Jambyl jalpy orta mektebinde jáne Sharbaqty aýdanynda 60 oryndyq balabaqsha ǵımaratynyń qaıta qurý jumystary júzege asyrylýda. Aqsý qalasynda jas natýralıster stantsııasy salynýda. Aǵymdaǵy jyly alǵashqy ret oblystyq bıýdjetten bilim berý nysandarynyń materıaldyq-tehnıkalyq bazasyn nyǵaıtý maqsatynda 1 mıllıard teńge bólingen. Mektep jıhazdary men ashana jabdyqtary jańartylyp, jańa kompıýterler satyp alynýda. Balalardy mektepke tasymaldaý maqsatynda 22 jańa avtobýs satyp alynǵan. Jańa oqý jylynan bastap barlyq mektepterde shahmat úıirmeleri jumys isteıdi. 146 mektepte ashylǵan robot tehnıksy kabınetterine 200 mıllıon teńgeden astam qarjy bólindi. Bıylǵy jylǵy túlekterdiń 50 paıyzǵa jýyǵy memlekettik bilim berý grantyna ıe boldy. Bul ótken jylmen salystyrǵanda 16 paıyzǵa artyq. Budan basqa, ótken oqý jyly aralyǵynda oblys mektepteri arasynda uıymdastyrylǵan arnaıy baıqaýdyń qortyndysy jarııalandy. Nátıjesinde oblystyq daryndy balalarǵa arnalǵan «Bilim-ınnovatsııa» lıtseı ınternaty jeńimpaz dep tanylyp, 19 mln 567 myń teńgelik sertıfıkatqa ıe boldy. Aqsý qalasynyń №2 jalpy bilim berý mektebi qalalyq, Pavlodar qalalyq №40 orta bilim berý mektebi aýyldyq oqý oryndary arasynan ozyq atandy. Ulttyq biryńǵaı testileýdiń qorytyndysy boıynsha úzdik kórsetkishke qol jetkizgen «Jas daryn» mamandandyrylǵan mektebi, Pavlodar qalalyq bilim berý bólimi jáne Sharbaqty aýdanynyń bilim berý bólimi de syı-syıapatqa ıe boldy.
