Pavlodar oblysynyń ákimi sheneýnikterden ınvestorlardy «qorqytpaýdy» surady
ASTANA. QazAqparat - Pavlodar oblysynda keıbir sheneýnikter óńirge ınvestorlardy tartýdyń ornyna mıllıondaǵan aıyppulmen jáne joǵary salyqtarmen «qorqytyp» jatyr.
Bul týraly jyldyń qorytyndy jınalysynda oblys ákimi Bolat Baqaýov málim etti, dep habarlaıdy pavlodarnews.kz.
-Ákimderge bir suraq qoıǵym keledi. Aralaryńda bıyl bir ınvestordy tartqandaryń bar ma?- dep surady óńir basshysy. Eshqandaı nátıje kórip turǵan joqpyn. Keıbireýleri ınvestorlardy tartýdyń ornyna kerisinshe shoshytyp qoıǵan. Mysaly, SEZ «Pavlodarmen» bolǵan jaǵdaıdy esterińizge túsirip kórińiz. Olar qurylys ýaqytynda paıdalanylǵan jerlerge 20 mıllıon teńge salyq tóleýi tıis edi. Biz mıllıardtaǵan qarajatpen jumys istep júrgende, osyndaı somadaǵy salyq boıynsha úlken shý shyqqan. Ertis aýdanynda 10 jyl boıy jumys istemeı turǵan elevatordy jóndep, qaıta iske qosqan «Kahalong-Astyq» JShS bir jyl ǵana sharýashylyqqa berilgen jerlerdi paıdalanbaǵany úshin 17 mıllıon teńgege aıyppul salyndy. Al, Aqsý qalasynda shetelden ınvestor kelip, jylyjaı salǵan. Onyń ákelgen qurylǵylaryn kedennen ótkizý úshin oblystyq memlekettik kiris departamenti basshysy Tólegen Sársembaevtyń kómegine júgindik. Osyndaı máselelerden keıin bizdiń aımaqqa kim kelgisi keledi. Qolushyn sozýdyń ornyna olarǵa túrli kedergi jasaımyz.
Bolat Baqaýov jınalys kezinde aýdan ákimderine taǵy da ınvestorlardy tartý jóninde eskertti. Budan basqa, aımaq basshysy kelesi jyly EKSPO-ǵa keletin bıznesmendermen kelissóz júrgizý kerek ekenin alǵa tartty. - Kórmede Pavlodar oblysynyń ınvestıtsııalyq jetistikteri kórsetiletin bolady, - dedi Bolat Baqaýov. "Nıet bildirgen azamattardyń barlyǵyn oblysqa ákelip, kásiporyndarmen tanystyrýǵa daıynbyz. Óz kezeginde ınvestorlar bizden qyzyqty usynystardy kútip otyr".
