Pavlodar oblysynyń ákimi ońtústikten qonys aýdaratyndarǵa jer bólýge ýáde etti
ASTANA. QazAqparat - Pavlodar oblysynyń ákimi Bolat Baqaýov ońtústik óńirlerdiń turǵyndaryna jer ýchaskelerin bólýge ázir ekenin aıtty, dep habarlaıdy QazAqparat.
«Ońtústikten soltústik óńirlerge qonys aýdarý taqyrybyna toqtalsaq, bıyl 377 otbasy kóship keldi (1665 adam). Eger isker adam bolsa, onda ol jergilikti jaǵdaıǵa tez beıimdeledi. Máselen, ońtústikte jer telimin alý qıyndaý. Al bizdiń oblysqa keletinderge jer ýchaskesin berýge daıynbyz», - dedi oblys ákimi Ortalyq kommýnıkatsııalar qyzmetinde.
Osy oraıda ol búginde Pavlodar oblysynda aýyl sharýashylyǵyn damytý boıynsha baǵdarlamalar az emes ekenin eske saldy.
«Kóship kelgender túrli salada jumys isteıdi. Bireýler zaýytqa ornalassa, qalǵandary aýyl sharýashylyǵy salasyn tańdaıdy. Biz aýyldyq jerlerdegi arzan turǵyn úılerdi tabýǵa, satyp alýǵa kómektesýge ázirmiz. Atap aıtqanda, árbir otbasyǵa 7 tonnadan kómir bóldik. Pavlodar oblysyna kelýge nıetti adamdardy yntalandyrý sharalaryn jalǵastyramyz», - dedi Bolat Baqaýov.
