Pavlodar oblysynyń ákimi ónim jııý naýqanyn monıtorıngileýdi uıymdastyrýdy tapsyrdy (FOTO)
PAVLODAR. QazAqparat - Pavlodar oblysynyń ákimi Bolat Baqaýov Sharbaqty aýdanynda jumys saparymen bolyp qaıtty. Aımaq basshysy «Pobeda» JShS-nyń egis alqaptaryn aralady, Sharbaqty aýdany ákiminiń aýdandyq máslıhat depýtattary aldynda bergen esebine qatysty jáne agroónerkásiptik keshendi damytý máselesi boıynsha keńes ótkizdi. Bul týraly ákimniń baspasóz qyzmeti habarlady.
Aımaqtyń agroónerkásiptik keshenin damytý máselesi jóninde ótken keńeste birinshi kezekte aldaǵy ónim jııý naýqany talqylandy. Bolat Baqaýov ósirilgen ónimdi ýaqtyly jáne shyǵynsyz jıyp alyp, qambaǵa jetkizýdi tapsyrdy. Aımaq basshysy sondaı-aq oblystyq aýylsharýashylyǵy basqarmasyna, qala jáne aýdan ákimderine barlyq kúsh-qýat pen quraldy kúzgi dala jumystaryn ýaqtyly da sapaly ótkizýge jumyldyrýdy, astyq ósirýshi aýdandarda shtabtar quryp, egin orý jumystarynyń barysyn monıtorıngileý boıynsha kezekshilik uıymdastyrýdy tapsyrdy. Dızeldik otynnyń aqysy ýaqtyly tólenip, otyn áketilýi tıis jáne t.b.
«Alǵashqy jartyjyldyq qorytyndysy boıynsha ónerkásiptiń jáne aýyl sharýashylyǵynyń fızıkalyq kólem ındeksi boıynsha parametrlerge qol jetken joq. Ústimizdegi jyldyń 9 aıyndaǵy qorytyndy boıynsha bul kórsetkishterdi jaqsartýymyz kerek. Aýdanda bul kórsetkishterdi arttyrý úshin barlyq alǵysharttary men qorlary bar. Sondaı-a, sizder barlyq qarajattyń tolyq kólemde ıgerilýin qamtamasyz etýlerińiz kerek», - dep atap ótti Bolat Baqaýov.
Sondaı-aq, Sharbaqty aýdanynyń balabaqshalarynda oryn jetkiliksiz. Bul máseleni sheshý úshin aýdan ákimine bar ǵımaratty balabaqsha etip jańartyp, bul jobany iske asyrýǵa aýdandyq bıýdjetten 10 paıyzdyq ortaq qarjylandyrý tabýdy júktedi. Al qalǵan qarajatty aımaq basshysy oblystyq bıýdjetten bóletinin aıtty.
