Pavlodar oblysynyń ákimi mektepterde ózara syılastyq sabaǵyn ótkizýdi usyndy

PAVLODAR. QazAqparat - Dástúrli tamyz konferentsııasynda Pavlodar oblysynyń ákimi Ábilqaıyr Sqaqov birinshi kezekte emotsıonaldyq tárbıege erekshe mán berý kerek ekenin atap ótti, dep habarlaıdy Pavlodarnews.kz.

«Árıne, emotsıonaldyq tárbıeni otbasynan bastaý kerek. Bul rette barlyq jaýapkershilikti muǵalimderge júktep otyrǵan joqpyn. Biraq búgingi tamyz konferentsııasynda pedagogtardyń qandaı úles qosa alatyny týraly aıtatyn bolamyn. Emotsıonaldy tárbıeniń maqsaty - balany óz emotsııalaryn túsinýge jáne tolyq bilýge úıretý. Sondaı-aq basqalarǵa janashyrlyq tanytý. Eger bala janashyrlyq tanyta almasa, týǵan jerge jáne otandastaryna degen ystyq sezimdi oıatý qıyn ekeni belgili», - dedi aımaq basshysy.

Oblys ákimi emotsıonaldyq tárbıege qatysty birneshe mysaldarǵa toqtalyp ótti. Máselen, amerıkalyq ǵalymdardyń 20 jyldan astam júrgizgen zertteýleri áleýmettik-emotsıonaldyq daǵdylary bar stýdentter orta eseppen alǵanda emotsıonaldyq tárbıesiz qurdastarymen salystyrǵanda standarttalǵan testiler boıynsha 11% joǵary ball alatynyn kórsetken.

Sonymen qatar AQSh jáne Eýropada ǵalymdary da áleýmettik-emotsıonaldyq daǵdylary bar jasóspirimder arasynda esirtki qoldaný jáne devıantty minez-qulyq jaǵdaılary basqa test-tobyna qaraǵanda 6% az ekenin anyqtaǵan. Al psıhologııalyq buzylý jaǵdaılary 13,5%-ǵa tómen bolǵan.

«Jańalyqtarda jıi shyǵyp jatqan balalardyń qatysýymen bolǵan jan túrshigerlik oqıǵalardy eskeretin bolsaq, dál qazir bizge qajet nárse osy emes pe? Eń aldymen, árbir balabaqshanyń, mekteptiń, kolledjdiń jáne ýnıversıtettiń qabyrǵalarynda jaǵymdy jáne qaýipsiz klımat qurý kerek. Al muny synyptan tys jasaýǵa bolady. Mysaly, empatııa sabaǵy, ózara syılastyq sabaǵy nemese tipti emotsıonaldy ıntellekt sabaǵy dep ataýǵa bolady. Jalpy ataýy týraly oılaný kerek», - dedi Ábilqaıyr Sqaqov.

Sondaı-aq ol mundaı sabaqtardy mektep qabyrǵasynan tys, ashyq aspan astynda ótkizýge bolatynyn atap ótti.

Foto: pavlodarnews.kz