Pavlodar oblysynyń ákimi: Qar jınaýmen birlesip aınalysý kerek
PAVLODAR. QazAqparat - Pavlodar oblysy ákiminiń óńirlik basqarmalar jáne aýdandar ákimderimen ótkizgen keńesinde eldi mekenderdi jáne avtomobıl joldaryn qardan tazartý jáne qar shyǵarý máselesi basymdyqty máselelerdiń biri boldy, dep habarlaıdy QazAqparat oblys ákimdiginiń resmı saıtyna silteme jasap.
Meteorologtardyń aqparaty boıynsha, qańtar aıynda oblysta qar normadan bir jarym-eki esege artyq jaýǵan.
Al shalǵaı aýdandardyń turǵyndary órkenıetten alshaqtap qalmaýy jáne joldarda kólik keptelisi bolmaýy úshin Ábilqaıyr Sqaqov aımaqta jáne oblys ortalyǵynda qardy jınaý jáne shyǵarý jumystaryn kúsheıtýdi talap etti. Ákimniń aıtýynsha, bul iske kommertsııalyq qurylymdar men qoǵam ókilderin tartý qajet.
– Qalalar men aýdandar ákimderine joldardy qala quraýshy jáne basqa da kommertsııalyq kásiporyndarmen birlesip tazartý boıynsha kúsh-jigerdi biriktirýdi tapsyramyn. Atqarylatyn jumystyń tıimdi bolýy úshin barlyq qyzmetterdiń jumysyn úılestirý kerek.
Keńeste Memleket basshysynyń QR Úkimetiniń keńeıtilgen otyrysynda kótergen máseleleri talqylandy. Ábilqaıyr Sqaqov basshylardyń nazaryn bıýrokratııalyq formalızmnen bas tartyp, halyqpen ashyq dıalog júrgizý qajettigine aýdardy. Solardyń biri qazirgi ýaqytta oblys qalalary men aýdandarynda ótetin ákimderdiń esep berý kezdesýleri bolýy tıis. Ákimder azamattardy esep berý kezdesýlerine deıin de, odan keıin de jeke qabyldaıtyn bolady. Bul ótinish bildirýshilerdiń máselelerin jedel sheshýge múmkindik beredi.
Esterińizge sala keteıik, aımaq basshysynyń esep berý kezdesýi 14 aqpanda ótedi. Kezdesý qarsańynda jáne odan keıin Ábilqaıyr Sqaqov da azamattardy qabyldaıdy.
Keńes qorytyndysy boıynsha oblys ákimi óńirdiń áleýmettik-ekonomıkalyq damýy máseleleri boıynsha birqatar naqty tapsyrmalar berdi.
