Pavlodar oblysynyń ákimi energııa stantsııalarynyń jylytý maýsymyna daıyndyǵyn tekserdi
ASTANA. QazAqparat - Qazirgi tańda óńirdegi áleýmettik nysandarǵa jylý berilgen. Turǵyn úılerge kelesi aptadan bastap jylý taratylatyn bolady, dep habarlaıdy pavlodarnews.kz.
Bolat Baqaýov Aqsýǵa jasaǵan jumys saparynda 70 myń turǵyny bar qalany jylytatyn aqsýlyq ferroqorytpa zaýytynyń qazandyǵynda boldy. Munda negizgi jáne qosalqy qurylǵylardyń jóndeý jumystary aıaqtalyp, áleýmettik nysandarǵa jylý berý bastalǵan.
«Qysqy mezgilge biz tolyq daıynbyz, - dedi AFZ-nyń bas energetıgi Igor Kýleshov. - Qazirgi kezde balabaqshalarǵa, mektepterge jáne medıtsınalyq uıymdarǵa jylý berilgen. 24 qyrkúıekten turǵyn úılerge jylý berýdi bastaımyz. Jylytý maýsymynda esh másele týyndamaýy kerek».
Sonymen qatar, óńir basshysy qala quramyna kiretin Aqsý kenti turǵyndarynyń úılerine jylý energııasyn jetkizetin «Eýroazıattyq energetıkalyq korporatsııasy» AQ-da bolyp qaıtty. Atalmysh kásiporynda №5 energııa blogynyń jóndeý jumystaryna qaramastan jylý berý bastalyp ketken.
«Pavlodar oblysyndaǵy jylý stantsııalarynyń barlyǵy jumysqa kirisýge daıyn jáne sáıkes qujattary bar, - dedi Bolat Baqaýov. - Óńirimizde normatıvti kómir zapasy bar. Barlyq áleýmettik nysandar qatty otynmen 100 paıyz qamtylǵan. Onyń ishinde jeke sektorlarǵa kómir tasymaldaý boıynsha artta qalý bar. Biz bul týraly birneshe ret eskertken bolatynbyz. Taǵy da jeke úı-jaıdyń ıeleri aldyn ala kómirmen qamtylýy kerek ekenin aıtyp ótkim keledi. Onyń ústine barlyq kenishter men kóterme oryndarda kómir jetkilikti».
Aıta keteıik, Aqsýda keler jyly jańa qalalyq qazandyq iske qosylady. Onyń jalpy quny 11 mlrd teńgeni quraıdy. Salynyp jatqan nysanda bir aıdyń ishinde qazandyqtyń jumystaryna, al, 2019 jyldyń mamyr aıynda iske qosý jumystaryna kirisedi.
