Pavlodar oblysynyń ákimi Baıanaýyl aýdanyndaǵy sý basý qaýpi bar aımaqtardy aralady
ASTANA. QazAqparat - Pavlodar oblysynyń ákimi Bolat Baqaýov Baıanaýyl aýdanyna arnaıy baryp, osy óńirdegi sý tasqynynyń qaýpi bar jerlerdiń jaǵdaıyn tikushaqpen baqylap shyqty, dep habarlaıdy pavlodarnews.kz.
Aımaq basshysy Bolat Baqaýov Pavlodar oblysymen shektesip jatqan qaraǵandylyq «Aqjar» bógetiniń qazirgi ahýalyna baǵa berdi. Qaraaşy aýylynda júrgizilip jatqan sý tasqynyna qarsy is-sharalarmen de tanysty. Budan keıin Aşysý ózeni arqyly ótetin kópir men byltyrǵy sý tasqynynan keıin qalpyna keltirilgen jol ýchaskelerin qarap shyqty. 2017 jylǵy tasqyndy kezeń eskerile otyryp, bıyl oblys boıynsha jalpy turǵyndar sany 4619 bolatyn 57 eldi meken aıryqsha baqylaýǵa alynǵan. Oǵan qosa, uzyndyǵy 4,951 shaqyrymdy quraıtyn avtomobıl joldarynyń 42 ýchaskesi, 0,1 shaqyrymdyq temirjol bóligi basa nazarda tur.
Búgingi kúni «Qazgıdromet» pavlodarlyq fılıalynyń málimetterine súıensek, oblys kóleminde áli erimegen qar jamylǵysy qalypty mólsherden 10 paıyzǵa jáne byltyrǵy qar deńgeıinen 30 paıyzǵa tómen. Qazirgi qar kólemi men meteorologııalyq boljam málimetterine súıensek, aımaq aýmaǵynda qardyń kúrt erýi bolmaıdy. Sondyqtan erigen qar sýynyń jappaı basý qaýpi az.
Soǵan qarmastan aımaqta qorǵanysh úımelerin berikteý jumystary da júrgizildi. Baıanaýyl aýdanynyń Teńdik, Qaraaşy aýyldarynda, Pavlodar qalasyna qarasty Kenjekól jáne Lenın kentterinde, Aqsý qalasynda jalpy uzyndyǵy 7,35 shaqyrym úıme nyǵaıtyldy. Turǵyndarmen aldyn alý sıpatyndaǵy sharalar júrgizilýde.
Oblystyń qalalary men aýdandarynda sý tasqyny kezeńine josparly túrde daıyndyq jumystary ótkizilip jatyr. 470 myń tekshe metr qar shyǵaryldy. Qajetti materıaldardyń qory jasaqtaldy. Atap ótsek, 227 tonna janar-jaǵarmaı, 220,5 myń tonna ınertti materıaldar, 52,3 myń qap daıyndaldy. Avtomobıl joldarynyń shaıylyp ketýiniń aldyn alý úshin jáne avtokólikterdiń úzilissiz qatynaýyn qamtamasyz etý maqsatynda jol qyzmetteri naýryz aıynyń sońyna deıin sý ótkizetin 1310 qubyrdy tazartý jáne ashý jumystaryn aıaqtaıtyn bolady.
Tótenshe jaǵdaılardyń aldyn alý jáne saldaryn joıýǵa oblysta 1 070 mlrd teńge (2017 jyly - 936,5 mıllıon teńge, 2016 jyly - 766,9 mıllıon teńge) aqshalaı qarajat qarastyrylǵan. Sý tasqyny jaǵdaıyn joıýǵa arnalǵan arnaıy kúsh pen quraldar toby belgilendi. Oǵan 600 tehnıka, júzý quraly men 1827 adam jumyldyrylǵan. Aýmaǵy Ertis ózeniniń jaǵasymen shektesip jatqan qalalar men aýdandardyń ákimdikteri «Vostokvzryvprom» JShS-men kelisimshartqa otyrǵan. ıAǵnı, qajet bolǵan jaǵdaıda ózenniń muzyn jarý qyzmetine júgine alady. Ertis ózenindegi sý tasqyny jaǵdaıyn boljaý maqsatynda Qazaqstan Respýblıkasynyń Shyǵys Qazaqstan oblysymen jáne Reseı Federatsııasynyń Omby oblysymen osy sý arnasyndaǵy muzdyń júrýi jaıynda aqparat alý boıynsha ózara árekettesýge ýaǵdalasty.
