Pavlodar oblysynyń ákimi avtobýs kútý ýaqytyn qysqartýdy tapsyrdy

PAVLODAR. QmazAqparat - Oblys ákimi Ábilqaıyr Sqaqov qalalyq kólik kásiporyndaryn aralaý barysynda tasymaldaýshylarǵa osyndaı mindet júktedi, dep habarlaıdy QazAqparat.

Óńir basshysy qala turǵyndarynan avtobýstardy uzaq kútýge týra keletini týraly shaǵymdar jıilep ketkenin atap ótti.

Ábilqaıyr Sqaqov № 1 avtobýs parkiniń basshylyǵyna memorandým aıasyndaǵy mindettemeler týraly eske saldy.

- Jazda 100-ge jýyq jańa avtobýs keledi dep kútilýde. Marshrýttardy kútý ýaqytyn 5-10 mınýtqa deıin barynsha qysqartý qajet. Sondaı-aq, qyzmet kórsetý deńgeıin kóterý kerek, - dep talap etti oblys ákimi.

Avtobýs parkiniń dırektory Aıtýar Janǵazın qazirgi tańda munda 62 júrgizýshi jumys isteıtinin jáne qazir arnaıy oqýdan ótetin qyzmetkerler shtaty qosymsha jumysqa qabyldanatynyn habarlady.

Oblys ákimi Asaın Baıhanovqa jáne avtopark dırektoryna memorandým aıasynda turaqty jumys júrgizýdi tapsyrdy.

Tramvaı basqarmasynda Ábilqaıyr Sqaqov vagon-jóndeý sheberhanasynyń jumysymen tanysty, elektrondyq bıletteýdiń engizilýin tekserdi.

«Tramvaı basqarmasy» AQ basqarmasynyń tóraǵasy Múslim Mahmýdov vagondarǵa ýaqytyly tehnıkalyq qyzmet kórsetý týraly aıtyp berdi.

- Jóndeý kezinde biz elektr qozǵaltqyshtaryn tolyǵymen alyp tastaımyz, moıyntirekterdi maılaımyz, elektr qural-jabdyqtaryn tekseremiz, - dedi Múslim Mahmýdov. - Jyl saıyn parktiń 60 paıyzy kúrdeli jáne aǵymdaǵy jóndeýden ótedi.

Oblys ákimi qala boıynsha «shýsyz» tramvaı jelilerin qalpyna keltirýdi ýaqytyly aıaqtaý, qala turǵyndaryn tasymaldaý qaýipsizdigin qamtamasyz etý jáne jolaýshylarǵa qyzmet kórsetý mádenıetiniń deńgeıin arttyrý qajettigin eske saldy.