Pavlodar oblysynyń ákimi aýyldarǵa aýyzsý tartý máselesin synǵa aldy

Pavlodar oblysynyń ákimi eki aýdannyń fermerlerimen kezdesti. Olar egin jıyny týraly óz boljamdarymen bólisti. Ábilqaıyr Sqaqov sondaı-aq, aýyldardy sýmen jabdyqtaý boıynsha jobalardyń iske asyrylý barysymen tanysty.

Tereńkól aýdanynda Ábilqaıyr Sqaqov birneshe sharýa qojalyqtarynyń – «Lysov» ShQ, «Alekparov» ShQ, «Altaı» ShQ, «Komanov» ShQ jáne «Vılgelm» ShQ alqaptarynda boldy. Fermerlerdiń kópshiligi osy jazda jaýyn-shashynnyń joqtyǵyna qynjylyp, dál osy faktor egin kólemine áser etkenin atap ótti. Búgingi tańda jergilikti dıqandar bir gektardan 10 tsentnerge deıin ónim jınap jatyr. Alaıda, sharýalardyń aıtýynsha, olar bıdaıdy tartymdy baǵamen satý múmkindigine ıe. Oblys ákimi qolda bar astyqty saqtap qalý qajettigine nazar aýdardy.

«Jumystardy agrotehnıkalyq merzimde atqaryp úlgerý mańyzdy. Eń bastysy-eginniń sapasyn qamtamasyz etý, bıdaıdy ýaqytynda jınap, keptirý, astyqty saqtaý erejelerin saqtaý», - dedi óńir basshysy.

Óńir basshysy Lvovka aýylynda jergilikti «Vılgelm» sharýa qojalyǵynyń qarajatyna salynǵan balabaqshaǵa bardy. Jobanyń quny – 40 mıllıon teńge. Búginde 30 balaǵa arnalǵan bóbekjaıǵa aýyldyń 2-den 5 jasqa deıingi 24 balasy barady. Sondaı-aq kásipker Aleksandr Vılgelm aýylda turyp qalǵan ǵımaratty qaıta qalpyna keltirip, qonaqúı keshenin ashty.

Baıqonys aýylynda Ábilqaıyr Sqaqov mádenıet úıinde boldy. Bıylǵy jyly munda «Jumyspen qamtýdyń jol kartasy» baǵdarlamasy boıynsha kúrdeli jóndeý júrgizildi. Aýyl turǵyndary jóndeý sapasyna rıza ekendikterin jetkizdi. Oblys ákimi qurylysshylar men memlekettik organdardyń jumysyna turǵyndar baǵa berýi tıis ekenin eske saldy. Óńir basshysy sondaı-aq «Ilarbek» sharýa qojalyǵynyń shujyq ónimderin óndiretin jergilikti tsehynda boldy. Munda 80-ge jýyq ónim shyǵarylyp, búkil oblys boıynsha jetkiziledi.

Tereńkól aýylynda Ábilqaıyr Sqaqov balalar, oqýshylar úıinde, mýzyka mektebinde jáne dene shynyqtyrý-saýyqtyrý kesheninde boldy. Aýdan ákimi Ernur Aıtkenov aýdan ortalyǵynda bıyl 20 kóshe jóndelgenin aıtty. Aýylda úsh shaqyrymnan aspaıtyn aýylishilik kóshelerdi abattandyrý qaldy. Kelesi jyly olardy aýdandyq bıýdjet esebinen jóndeýge ýáde bergen eken.

Qyzyltań aýylynda óńir basshysy sý qubyrynyń qurylysyn tekserdi. Ortalyq sýmen jabdyqtaýǵa barlyq 107 aýlanyń turǵyndary qosylýǵa daıyn. Alaıda, qujattamaǵa sáıkes, joba kelesi jyly, sý tazartý stantsııasy ornatylǵan soń ǵana aıaqtalý kerek. Ábilqaıyr Sqaqov aýyl úshin ómirlik mańyzy bar ınfraqurylymdyq jobalardyń mundaı josparlanýyn synǵa aldy.

«Ortalyq sýmen jabdyqtaýǵa baılanysty joba bir jyldan ekinshi jylǵa aýyspaýy kerek. Adamdardy kútkizbeý úshin bizge jedel sheshimder qajet», - dedi ákim.

Jelezın aýdanynyń Bashmachnoe aýylynda da osyndaı jaǵdaı oryn aldy. Munda sý qubyryn salý jobasy 13 aıǵa eseptelgen. Merdiger nysandy bıylǵy jyly tapsyrýǵa daıyn, biraq oǵan degen qarajat kelesi jylǵa ǵana josparlanǵan. Óńir basshysy jobany osy jyldyń sońyna deıin aıaqtaý múmkindigin qarastyrýdy tapsyrdy. Jańa sý qubyrynan basqa Bashmachnyıda jańartylǵan mádenıet úıiniń ashylýy kútilýde.

Bashmachnoe-Ozernoe tasjolynda Jelezın aýdanynyń basshysy Qanat Qashkırov jol tóseminiń jóndelýi týraly baıandady. Aýyl turǵyndary birneshe ret shaǵymdanǵan problemalyq ýchaske búginde sýyq resaıklıng tehnologııasy boıynsha abattandyrylýda. Bul joldyń beriktigi men saqtalýyn qamtamasyz etýi kerek.

Ýálıhanov aýylynda Ábilqaıyr Sqaqovqa taǵy bir jobanyń júzege asyrylýy týraly baıandaldy. 150-den astam jeke aýlalar men nysandardy ortalyq sýmen qamtamasyz etetin sý qubyryn iske qosý-retteý qazan aıynyń basyna josparlanýda. Qarasha aıynyń ortasynda aýyl turǵyndary sapaly aýyz sý alady dep kútilýde. Ýálıhanov turǵyndary oblys ákiminen basqa máseleni sheshýdi surady – jergilikti feldsherlik-akýsherlik pýnktte medıtsına qyzmetkeri joq. Aldyńǵy medıtsına qyzmetkeri ótken jyldyń sońynda zeınetke shyqty. Óńir basshysy bul máseleni bir aılyq merzimde sheshýdi tapsyrdy.

Jelezınka aýylynda Ábilqaıyr Sqaqov úshinshi jyl jumys istep kele jatqan «Kýkýzov» JK-niń jol boıyndaǵy keshenine bas suqty jáne «Vıtkovskıı» JK shujyq tsehynyń jumyskerlerimen sóılesti. Sondaı - aq ákim ótken jyly «Aýyl-el besigi» baǵdarlamasy boıynsha kúrdeli jóndeý jumystaryn júrgizilgen aýdandyq mádenıet úıinde boldy. Májilis zalynda óńir basshysy jergilikti volonterlermen jáne etnomádenı birlestikterdiń ókilderimen kezdesip, olardy Konstıtýtsııa kúnimen quttyqtady.

Jelezın aýdanynda Ábilqaıyr Sqaqov birneshe sharýa qojalyqtarynyń – «Agro Capital» JShS, «Altyn jer» ShQ jáne «Pahar» ShQ alqaptarynda boldy. Jergilikti fermerler de osy jazda jańbyrdyń bolmaǵanyna nazar aýdardy. Qazir munda aýyl sharýashylyǵy óndirýshileri bir gektardan 11 tsentnerge deıin bıdaı alady. «Agro Capital» JShS-de dándi daqyldardan basqa, sýarmaly jerlerde kartop ósiriledi. Kompanııa qazirdiń ózinde tanymal bólshek saýda jelisine shamamen 5 myń tonna kartop jetkizý kelisimshartyna ıe. Oblys ákimi jergilikti kartop ósirýshilerge maýsymaralyq kezeńde – qańtardan sáýirge deıin ishki naryq úshin qajetti sapaly ónim kólemin saqtaý qajet ekenin atap ótti.