Pavlodar oblysynyń ákimi aýdan basshysyna: Qysta asfalt tóseıtinińiz qalaı

PAVLODAR. QazAqparat – Pavlodar oblysy ákimdiginde ótken apparat keńesinde «Aýyl – el besigi» jobasynyń júzege asyrylý barysy talqylandy, dep habarlaıdy QazAqparat Pavlodarnews.kz saıtyna silteme jasap.

Pavlodar oblystyq Ekonomıka jáne bıýdjettik josparlaý basqarmasynyń basshysy Irına Nazarchýktiń jetkizgen aqparatyna qaraǵanda, joba iske asyrylǵan eki jylda jalpy halyq sany 70 myńǵa jýyq 20 aýylda barlyǵy 120 joba oryndaldy. Quny – 5,3 mlrd teńge.
«Bıyl 22 aýyldy modernızatsııalaý josparlandy. Oǵan 5 mlrd teńge bólindi. Qazirgi kezde onyń 4,1 mlrd teńgesi nemese 85,9 protsenti ıgerildi. Montajdaý 65 nysanda aıaqtaldy», - deıdi Irına Nazarchýk.

Oblys ákimi Ábilqaıyr Sqaqov halqynyń 30 protsenti aýylda turatyn óńir úshin «Aýyl – el besiginiń» qanshalyqty mańyzdy ekendigin atap ótip, el turmysynyń artqanyna kóńili tolatynyn aıtty. Máselen, aýyldaǵy turmys sapasy 61,5 paıyzdan 68-ge artqan.
«Bul, árıne, qýantarlyq jaıt. Degenmen, jobanyń júzege asyrylýynda táýekelder de joq emes. Jergilikti atqarýshy organdar olardy der kezinde boljap, aldyn alýlary tıis», - dedi ákim.

Aıtalyq, Baıanaýyl aýdanyndaǵy eki aýylda bıyl ishki joldar jóndelýi tıis bolatyn. Musa Shorman aýylynda bári oıdaǵydaı aıaqtalsa, Jańajol aýylynda 1 qyrkúıekte aıaqtalatyn jumystar áli bitpegen. Aýdan ákimi Qanat Kárimovtiń aıtýynsha, merdiger asfalttaýdy osy aptada oryndaıdy.
«Qysta asfalt tóseıin dep jatyrsyz ba? Munyńyz qalaı? Eki aýyldy modernızatsııalaýǵa bıýjetten 300 mln teńge bólindi. Jumys nege baıaý júrgizilýde?», – dedi Ábilqaıyr Sqaqov.

Sóz sońynda óńir basshysy ákimderge bıýdjettik josparlaý máselesine óte muqııat qaraý kerektigine erekshe nazar aýdardy.