Pavlodar oblysynyń ákimi apta saıyn qabyldaý ótkizedi

NUR-SULTAN. QazAqparat - Pavlodar oblysynda áleýmettik máselelerdi sheshýge 52 mlrd teńge bólindi. Bul týraly óńir ákimi Bolat Baqaýov málimdedi, dep habarlaıdy QazAqparat tilshisi.

«Jalpy áleýmettik máselelerdi sheshýge bıýdjetten 52 mlrd teńge bólindi. Jańa format boıynsha ataýly áleýmettik kómek 8 609 otbasyna tólendi. Jumyspen qamtý sharalaryna 20 myńǵa jýyq jumyssyz jáne ózin-ózi jumyspen qamtyǵandar tartyldy. Jyl basynan beri 12 myńnan astam jańa jumys orny quryldy. Onyń 9 myńnan astamy - turaqty jumys oryndary», - dedi ákim Ortalyq kommýnıkatsııalar qyzmetinde ótken baspasóz máslıhatynda.

Sonymen birge, ákim eńbek naryǵyndaǵy belsendi sharalar arqyly jumyssyzdyq deńgeıin 4,7% túsirgenin jetkizdi.

«Halyqty jeke qabyldaý arqyly kóptegen áleýmettik máselelerdiń sheshimin taýyp júrmiz. Munyń barlyǵy «Halyqtyń únine qulaq asatyn memleket» tujyrymdamasy aıasynda jasalyp jatyr. Apta saıyn ár seısenbide «Nur Otan» partııasyna kelip, halyqty qabyldaımyn. Nemese turǵyndar Instagram arqyly, oblys ákimdigindegi beıneúndeý arqyly júgine alady. Aı saıyn «Nur Otan» partııasynda ardagerler, múgedekter, densaýlyq saqtaý mamandary, ustazdar qaýymy, qamqorshylyq keńes syndy halyqtyń belgili bir toptarymen kezdesemin. Oblystyń ózge qalalary men aýdandarynda da ákimder dál osylaı kezdesý uıymdastyrady, áleýmettik jelilerdi belsendi paıdalanady. Biz halyqtyń ózekti máselelerin bilemiz jáne olardy tezirek sheshýge tyrysamyz», - dedi ákim.

Aıta keteıik, Pavlodar oblysynyń ákimi Bolat Baqaýov elordada 2019 jyldyń 10 aıyndaǵy óńirdiń áleýmettik-ekonomıkalyq damýy týraly esep berýde. Buǵan deıin ákim óńirdiń eksporttyq áleýeti, ınvestıtsııalyq jobalary týraly baıandaǵan bolatyn.