Pavlodar oblysynyń ákimi 850 gektardy sharpyǵan orman órtiniń qashan sóndirilýi yqtımal ekenin aıtty

ASTANA. QazAqparat – Pavlodar oblysynyń ákimi Asaıyn Baıhanov «Ertis ormany» rezervatynda bolyp jatqan órttiń qashan tolyq sóndirilýi múmkin ekenin aıtty, dep habarlaıdy QazAqparat tilshisi.

«Qurmetti jerlester! Búgin saǵat 14:00-de Sharbaqty aýdanyndaǵy «Ertis ormany» rezervaty aýmaǵyndaǵy tabıǵı órt oqshaýlandy. Aldaǵy birneshe kúnde órtti tolyq sóndirý josparlanyp otyr. Bul rette órt oshaqtaryn anyqtap, olardyń qaıta tutanbaýyn qadaǵalaý mańyzdy. Sonymen qatar tilsiz jaýmen kúreske jumyldyrylǵan órt sóndirýshiler men ormanshylarǵa alǵys bildiremin», - dedi Asaıyn Baıhanov óziniń Instagram paraqshasynda jarııalaǵan habarlamasynda.

Buǵan deıin «Ertis ormany» rezervatynda 850 gektar jer órtenip jatqany týraly habarlaǵan edik.

Oqıǵa ornyna Tótenshe jaǵdaılar mınıstri Syrym Sháriphanov baryp, jaǵdaıdy óz baqylaýyna aldy.

Aıta keteıik, keshe «Ertis ormany» rezervatynda órt shyqty.

QR Tótenshe jaǵdaılar mınıstrligi baspasóz qyzmetiniń habarlaýynsha, 15 shilde kúni Sharbaqty aýdanynyń Stepnoe jáne Baýyrtal ormanshylyqtarynda ormannan órt shyqty.