Pavlodar oblysynyń 9 jasar oqýshysy mentaldy arıfmetıkadan Dýbaıda ótetin halyqaralyq olımpıadaǵa qatysady
ASTANA. QazAqparat - Pavlodar oblysy Kachır aýdanyndaǵy №3 orta mekteptiń 3-synyp oqýshysy Dilnaz Qazbaı mentaldy arıfmetıka boıynsha Dýbaıda ótetin halyqaralyq olımpıadaǵa qatysady, dep habarlaıdy pavlodarnews.kz.
Toǵyz jasar Dilnaz Qazbaıdyń buǵan deıin baǵyndyrǵan belesteri az emes. Ol - oısha esep shyǵarýdyń júırigi. Kóp tańbaly sandardy kóbeıtý jáne bólýdi esepteý qurylǵysyn qoldanbaı-aq shyǵara beretin oqýshy qazirgi tańda UCMAS Kazakhstan halyqaralyq mentaldy arıfmetıka akademııasynyń Pavlodardaǵy fılalynda qosymsha bilim alady. Dilnaz aǵymdaǵy jyldyń mamyr aıynda Astana qalasynda ótken mentaldy arıfmetıka olımpıadasynyń respýblıkalyq kezeńinde 1000-ǵa tarta qatysýshynyń ishinen ekinshi orynǵa ıe bolǵan. Sol jarysta ol qarasha aıynyń 11-i kúni Birikken Arab Ámirlikteriniń Dýbaı qalasynda ótetin XXI halyqaralyq olımpıadaǵa joldama jeńip alǵan. - Dýbaıǵa álemniń 22 elinen 7 myńǵa tarta bala barady. Qazaqstannyń barlyq oblystarynan 60-taı oqýshy joldama aldy. Pavlodardyń namysyn jalǵyz Dilnaz Qazbaı ǵana qorǵamaq. Ol bizdiń ortalyqqa byltyrdan beri kelip júr. Shetelden jaqsy nátıjemen oralaryna senimdimiz, - deıdi UCMAS Kazakhstan halyqaralyq mentaldy arıfmetıka akademııasynyń Pavlodardaǵy fılaly dırektorynyń orynbasary Aızada Qasymova.
Aıta keterligi, mentaldy arıfmetıka akademııasy 4-12 jas aralyǵyndaǵy erekshe daryndy balalardy qabyldap, oısha esep shyǵarý qabiletin odan ary damytady. Byltyr Nıý Delı qalasynda ótkizilgen XX Búkilálemdik jarysta 52 memlekettiń arasynan Qazaqstan búldirishinderi 5 altyn jáne 11 kúmis medalmen oralǵan.
