Pavlodar oblysynyń 50 pedagogy 2,7 mln teńgeden alady
PAVLODAR. QazAqparat - Muǵalimder kúni qarsańynda Pavlodar oblysynyń 15 pedagogy «Pavlodar oblysynyń bilim berý júıesin damytýǵa qosqan úlesi úshin» tósbelgisimen jáne árqaısysy 2,7 mıllıon teńge kólemindegi syıaqymen marapattaldy, dep habarlaıdy QazAqparat.
Pedagogtarǵa nagradalardy búgin oblys ákimi Ábilqaıyr Sqaqov tabys etti.
«Bul, bir mamandyqtyń ǵana merekesi bolǵanyna qaramastan, ol bizdiń árqaısymyzǵa qatysty. Bul kúni biz muǵalimder men tálimgerlerdi quttyqtaımyz. Kóptegen adamdardyń jaqyn adamdary osy mańyzdy jáne asyl mamandyqtyń ókilderi bolyp tabylady. Muǵalimder kúni - biz jaqsy kóretin jáne kútetin mereke», - dedi ákim ustazdarǵa.
Óńir ákimdiginen málim etkendeı, bıyl Pavlodar oblysynda bilim berý júıesin damytýǵa erekshe úles qosqan muǵalimder úshin marapat alǵash ret taǵaıyndaldy. Ábilqaıyr Sqaqov óz bastamasy týraly 2020 jyldyń aqpan aıynda oblys halqy aldyndaǵy esebi kezinde habarlaǵan bolatyn.
«Marapatqa kez kelgen muǵalim ótinish bere alatyndyǵyn aıta keteıik. Negizgi krıterııler úmitkerdiń eńbek ótili, óziniń jáne onyń shákirtteriniń respýblıkalyq jáne halyqaralyq olımpıadalardaǵy jetistikteri, sondaı-aq oqý quraldarynyń avtorlyǵy boldy. Júldegerlerdi quramyna pedagogıkalyq eńbek ardagerleri, úkimettik emes sektor, salalyq kásipodaq jáne sybaılas jemqorlyqqa qarsy qyzmet ókilderi engen komıssııa iriktep aldy», - dedi ákimdikten.
Osylaısha, búgin 15 ustaz tósbelgimen birge 2,7 mıllıon teńgeden aldy. Bıylǵy jyl sońyna deıin osyndaı marapatty taǵy 35 pedagog alatyn bolady
«Pavlodar oblysynyń ákimdigi jyl saıyn salany qarjylandyrýdy ulǵaıtyp otyr. Bul bizge mektepterimizdi kórkeıtip qana qoımaı, pedagogtarymyzdy da kótermeleýge múmkindik beredi. Biz aýyl jáne qala muǵalimderin qoldaýdy mindetti túrde jalǵastyratyn bolamyz. Respýblıkalyq jáne oblystyq bilim berý júıesiniń negizgi mindetteriniń biri – qala men aýyl mektepteri arasyndaǵy alshaqtyqty azaıtý», - dedi Ábilqaıyr Sqaqov.
Marapattaý rásiminen keıin óńir basshysy men pedagogtar buǵan qandaı ózgerister yqpal ete alatynyn jáne bilim berý salasyna ne qajet ekenin talqylady. Sonymen qatar muǵalimder aýyl mektepterin «Zamanaýı mektep» baǵdarlamasymen qamtyp, daryndy balalardy qoldaý úshin oblystyq júlde qoryn qurýdy usyndy.
Bilim berýdi damytýdyń orta merzimdi baǵdarlamasyn daıyndaý barysynda barlyq pikirler men usynystardy eskerýge ýáde berildi.
Sýretti túsirgen Valerıı Býgaev
