Pavlodar oblysynyń 28 aýylynda uıaly baılanys joq

ASTANA. QazAqparat – Pavlodar oblysynyń ákimi Asaıyn Baıhanov Ortalyq kommýnıkatsııalar qyzmetinde ótken brıfıngide óńirdegi uıaly baılanys joq 28 aýyldyń máselesi qashan sheshiletinin aıtty, dep habarlaıdy QazAqparat tilshisi.

«Bizde 360 mektep bar. Onyń tórteýi jeke menshikte. 356 mektep memleket menshiginde. Óńirdegi mektepterdiń úshten ekisi shaǵyn jıyntyqty. Tipti alty nemese odan da az oqýshysy bar mektepter bar. Siz ınterneti joq dep ataǵan mektepterdiń máselesi boıynsha Tsıfrlyq damý mınıstrligimen, «Qazaqtelekommen» tyǵyz jumys istep jatyrmyz. Memlekettik organdardan bólek talshyqty-optıkalyq baılanys ornatýǵa daıyn jeke ınvestorlarmen jumys istep jatyrmyz. Atap aıtsaq, eki kompanııamen kelissóz júrgizdik», - deıdi Asaıyn Baıhanov.

Ákim atalmysh ınvestorlarǵa talshyqty-optıkalyq ınternetti mektepke ǵana emes, tutas aýylǵa tartýdy usynyp otyrǵandaryn aıtady.

«Jalpy oblysta úıdegi ınternet te, uıaly baılanys pen uıaly ınternet atymen joq 28 aýyl bar. Bul máseleni kelesi jyly tolyq sheshemiz», - dedi aımaq basshysy.

Sondaı-aq, Asaıyn Baıhanov Ekibastuz ben Aqsýda fermerlik bazar ashylatynyn málim etti.