Pavlodar oblysynyń 10 myńdaı turǵyny sapaly aýyzsýmen qamtylmaq
ASTANA. QazAqparat - Aldymyzdaǵy jyly Pavlodar oblysynyń 10 myńdaı turǵyny sapaly aýyzsýǵa qol jetkizedi, dep jazady Habar 24.
Qazir Maı aýdanynda sý taratý qubyrynyń qurylysy qarqyn alǵan. Іske qosylǵanda tirshilik nári aýdannyń barlyq eldi mekenderine jetedi. «Aqbulaq» baǵdarlamasy aıasynda qolǵa alynǵan jobaǵa respýblıkalyq bıýdjetten 5 jarym mıllıard teńgeden asa qarjy bólingen. Maı aýdanynyń turǵyndary toptyq aýyzsý qubyryn uzaq jyldar boıy kútip keledi. Jergilikti bılik 2010 jyly bul máseleni sheshýge áreket etken bolatyn. Biraq keıbir sebeptermen qurylysty bastaý múmkin bolmady. Turalap qalǵan sol kezdegi jumys araǵa 8 jyl salyp qaıta jandandy. Búgingi kúni qurylystyń 55 paıyzy aıaqtalypty. Sý tartylatyn alǵashqy bekette 7 uńǵyma qazyldy. Sýdyń qaınar kózi dál osy jerden bastaý alady.
«Bizdiń esebimiz boıynsha sekýndyna 8 lıtr sý keledi. Uńǵymalar 16-dan 14 metrge deıin tereńdikte qazylǵan. «Gıdrogeologııa» 20 jylǵa jetetin sý qory baryn anyqtap berdi. Bul - jańa tehnologııa. Ispanııada óndirilgen qubyrlar. Qazir Astanada jasalady. Óte qolaıly. Ispanııada bul qubyrlardyń qoldanylý merzimi 70 jyl eken. Bizde 35-50 jyl dep otyr»,- deıdi telim sheberi Arman Ospanov.
Bolashaq sý beketi osy. Munda bastapqy sý keletin rezervýarlar, eki myń tekshe metrlik taza sýǵa arnalǵan qoımalar jáne ekinshi sorǵy stansasy ornalasady. Sońǵysynan sý magıstraldi toraptarǵa taralady. Qoldanylatyn jańa tehnologııalar sýdyń quramyn túrli qospalar men aýyr metaldardan tazartady.
«Sýdyń quramy eki qaıtara tazartylady. Aldyn ala óńdelgennen keıin baryp saz tutqydan jáne sińirgish súzgiden ótedi. Minsiz taza sý ekinshi sorǵy arqyly magıstralǵa, odan keıin toraptarǵa jiberiledi», - telim basshysy Aleksandr ıAsonın.
Toptyq sý taratý magıstraliniń uzyndyǵy 142 shaqyrymdy alyp jatyr. Avtokólik boıymen júretin sý qubyry 16 aýyldy basyp ótedi. Keleshekte taǵy 6 aýyldy qosý josparlanyp otyr. Magıstral qurylysyna óz elimizde shyǵarylatyn materıaldar qoldanylyp jatyr. Arman Ospanov, telim sheberi:
Kelesi jyly jergilikti bılik sý qubyrlaryn aýyl ishine tartý jumystary bastalatynyn aıtady. Joba boıynsha aýyzsý turǵyn úılerge 2020 jyly berile bastaıdy.
