Pavlodar oblysyndaǵy jol ýchaskesinde olqylyqtar anyqtaldy

PAVLODAR. QazAqparat - Jol aktıvteriniń ulttyq sapa ortalyǵynyń mamandary Pavlodar oblysyndaǵy «Maıqaıyń – Ekibastuz» jolynyń sapasyn tekserip, birqatar zań buzýshylyqtardy anyqtady, dep habarlaıdy QazAqparat IIDM baspasóz qyzmetine silteme jasap.

«Barlyq buzýshylyq faktileri boıynsha tapsyrys berýshige, merdigerge jáne ýákiletti organdarǵa buzýshylyqtardy joıý týraly hattar jiberildi», delingen habarlamada.

Avtomobıl joldary komıtetine qarasty «Jol aktıvteriniń ulttyq sapa ortalyǵy» RMK baspasóz qyzmetiniń málimetinshe, mamandar 2017 jyly paıdalanýǵa berilgen «Maıqaıyń - Ekibastuz» jolyna barǵan. Joba quny - 1 mlrd 563,4 mln teńge.

Jalpy uzyndyǵy – 18 shaqyrym. Tapsyrys berýshi - Pavlodar oblysynyń jolaýshylar kóligi jáne avtomobıl joldary basqarmasy, jumysty istegen merdigerler - «Gıdroprom» JShS jáne «Statýs Lıýks» QK.

«Bul ýchaskelerde joldyń asfaltbeton jamylǵysynda jaryqtar, shuńqyrlar paıda bolyp, asfalt shytynaýy baıqalady. Osy ýaqytqa deıin de fılıal qyzmetkerleri nysanǵa baryp, jol-qurylys materıaldaryn tekserip, synama úlgilerin: ústińgi qabattan 10 jáne tómengi jabyn qabatynan 10 úlgi aldy. Al bul joldy tekserý barysynda alynǵan materıaldar boıynsha asfalttyń qalyńdyǵy sáıkes kelmedi, sýǵa qanyǵý men tyǵyzdyq koeffıtsıentteri de durys emes mólsherde ekeni anyqtaldy. Sonyń saldarynan asfalt qabynýǵa ushyrap jatyr», delingen habarlamada.