Pavlodar oblysyndaǵy tasjolda 55 kólik qar qursaýynda qaldy
PAVLODAR. QazAqparat – Pavlodar oblysynan Qaraǵandyǵa bara jatqan jolda qutqarýshylar júk kóligi, jeńil kólik pen avtobýstardy qar qursaýynan shyǵardy, dep habarlaıdy QazAqparat tilshisi.
«25 jeltoqsan kúni 14:00-de Ekibastuz aýyldyq aımaǵy Bozshakól aýylynan 15 km qashyqtyqtaǵy aınalmada qatty boran saldarynan Qaraǵandyǵa bara jatqan júk jáne jeńil kólikteri, jalpy sany 55 tehnıka (40 júk kóligi, 3 avtobýs jáne 12 jeńil kólik) jolda turyp qalǵan. Bul aımaqty «Qazavtojol» JShS qardan tazalady (keptelis 5-6 kılometrge sozylǵan)», - dep hbarlady Pavlodar oblystyq Tótenshe jaǵdaılar departamentiniń baspasóz qyzmeti.
Keptelis oryn alǵan jerge kelgen TJD qyzmetshileri jolaýshylardy jylytý pýnkterine jetkizbekshi bolǵan, biraq olar bas tartqan.
«Qardan tazalaý nátıjesinde 18:00 shamasynda birinshi bolyp 12 jeńil kólik qar qursaýynan bosatyldy. Odan keıin qalǵan kólikter de shyǵaryldy», - dedi Pavlodar oblystyq TJD.
Ótken táýlikte Pavlodar oblysynda aýa raıy nasharlap, boran, burqasyn turyp, kórinis nasharlaǵandyqtan respýblıkalyq jáne oblystyq mańyzy bar tasjoldarda apattyq-qutqarý jumystary júrip jatyr.
«24 jeltoqsanda 800 myńnan asa uıaly baılanys abonentterine aýa raıyna baılanysty eskertý habarlamasy jiberildi. Sonymen qatar, «Dármen» mobıldik baǵdarlamasy arqyly da habarlama taratyldy, áleýmettik jelilerde eskertý jarııalandy, soǵan qaramastan jolǵa shyǵatyn azamattar jıi qıyn jaǵdaıda qalady», - deıdi qutqarýshylar.
Olardyń sózi boıynsha, Qazaqstan men Reseıdiń shalǵaı aımaqtarynda eskertýge qaramastan avtobýstardy jolǵa jiberedi.
Anton Gagarın
