Pavlodar oblysyndaǵy sý shaıyp ketken jol qalpyna keltirildi

NUR-SULTAN. QazAqparat - QR ІІM Tótenshe jaǵdaılar komıteti Pavlodar oblysyndaǵy respýblıkalyq mańyzy bar joldy qalpyna keltirý jumystarynyń aıaqtalǵanyn málimdedi, dep xabarlaıdy QazAqparat tilshisi.

Resmı aqparatqa sáıkes, respýblıkalyq mańyzy bar «Qalqaman - Baıanaýyl - Úmitker - Ýlıanov» avtojolynyń 101 shaqyrymynda shaıylǵan joldy qalpyna keltirý jumystary aıaqtaldy. Jol ýchaskesi tolyǵymen qalpyna keldi. Avtokólikter úshin qozǵalys ashyq.

«Endi «Ekaterınbýrg - Almaty» avtojolynyń sý shaıǵan bir jol tósemi (795-856 shaqyrym) qalyp otyr», - delingen komıtettiń resmı xabarlamasynda.

Al komıtet tóraǵasy Vladımır Bekkerdiń sózine qaraǵanda, kesheden beri respýblıka boıynsha turǵyn úıler men aýla aımaqtaryn sý basý, respýblıkalyq mańyzy bar joldar arqyly sý júrý oqıǵalary tirkelgen joq.

Aıta keteıik, búgingi brıfıngte komıtet basshysy elordaǵa jaqyn Qosshy aýylyndaǵy aýyz sý máselesin túsindirdi.

«Ol jaqta aýyz sý jınaqtaıtyn eki qondyrǵy bar. Bireýinde 6 uńǵyma, atalǵan qondyrǵy jumys istep tur. Oǵan qosa, taǵy bir qondyrǵyny salý jumystary bastalǵan bolatyn. Onda 14 uńǵyma bar. Dál osy qondyrǵynyń 9 uńǵymasyn sý basyp qaldy. Olardyń bári istemeı tur, qalǵany durys. Negizi, ol qondyrǵynyń qurylysy áli aıaqtalǵan joq. Resmı túrde paıdalanýǵa da berilmedi. Alaıda ol jerden aýyz sý turǵyn úılerge berilip turady», - dedi V.Bekker elordada ótken baspasóz máslıxatynda.

Onyń aıtýynsha, tártip boıynsha jańa sý qondyrǵysynyń aınalasyn topyraqpen úıip tastaý qajet. Sonda ishine sý kirmeıdi. Biraq ondaı sharalar atqarylǵan joq.

«Negizi, qazir Qosshyda sý bar. Maǵan solaı baıandady. Biraq turǵyn úılerde aýyz sý joǵary qabattarǵa jetpeı jatyr. Qysym az, sol jaǵynan qıyndyq bar. 4-5 qabattarǵa jetpeı jatyr dedi», - dep atap kórsetti V.Bekker.

Komıtet basshysy Qazgıdromettiń aldaǵy boljamyna alańdap otyrǵanyn da jasyrmady.