Pavlodar oblysyndaǵy nysandarda órt qaýipsizdiginiń jeke júıesi ornatylǵan - Baqaýov
PAVLODAR. QazAqparat - Pavlodar oblysynyń ákimi óńirdegi adam kóp jınalatyn oryndardyń qaýipsizdigi jáne shuǵyl qyzmetterdiń jumysy týraly aıtty, dep habarlaıdy QazAqparat.
«Zor qasiret (Kemerovodaǵy saýda úıinde bolǵan órt - red.). Reseıde bul sońǵy bir ǵasyrda bolǵan eń iri órt dep baǵalanyp jatyr. Men qaza tapqan jandardyń otbasylaryna kóńil aıtamyn. Bizdiń shuǵyl qyzmetter osyndaı apattardyń aldyn alý baǵytynda jaqsy jumys istep jatyr dep aıta alamyn. Óńirde TJ nusqaýy boıynsha jabylýy tıis nysandar joq. Alaıda, arnaıy qyzmet ókilderinen eskertý alǵan nysandar bar, olar bul kemshilikterdi joıý jumystaryn júrgizip jatyr», - dedi Pavlodar oblysynyń ákimi Bolat Baqaýov óńirlik «Ertis» arnasyna bergen suhbatynda.
B.Baqaýovtyń aıtýynsha, órt qaýipsizdigi máselesin óńirlik bılik erekshe nazarda ustaıdy.
«Adamdar kóp jınalatyn oryndar bar. Ol jerlerde bizdiń jeke baqylaý júıemiz ornatylǵan. Sondyqtan alańdaýdyń esh qajeti joq, bári qadaǵalanyp otyr», - deıdi ákim.
Eske sala keteıik, 26 naýryz kúni Reseıdiń Kemerovo qalasyndaǵy «Zımnıaıa vıshnıa» saýda úıinde alapat órt bolyp, 64 adamnyń ómirin jalmady. Tilsiz jaý 1,5 myń sharshy aýmaqty sharpyǵan. Qazaqstan Respýblıkasy Syrtqy ister mınıstrliginiń aldyn ala málimeti boıynsha qaza tapqandardyń ishinde bizdiń eldiń azamattary joq. 
