Pavlodar oblysyndaǵy «Ertis ormany» alqabynda bolǵan órtke bizdiń qatysymyz joq - «KEGOC» kompanııasy
ASTANA. Qyrkúıektiń 15-i. QazAqparat - Pavlodar oblysyndaǵy «Ertis ormany» alqabynda bolǵan órtke «KEGOC» AQ-nyń eshbir qatysy joq. Eske sala keteıik, bunyń aldynda BAQ betterinde Pavlodar oblysyndaǵy «Ertis ormany» alqabynda shyqqan órtke 500 kV-tyq EEK - Rýbtsovsk 5527 áýe jelisinde bolǵan qysqa tuıyqtalý sebep bolýy múmkin degen kúdikpen qylmystyq is qozǵalǵandyǵy jóninde aqparat taraǵan bolatyn.
Búgin kompanııa Pavlodar oblysyndaǵy «Ertis ormany» alqabynda bolǵan órtke qatysty birqatar BAQ betterinde jarııalanǵan materıaldarǵa túsinik berý maqsatynda habarlama taratty.
Bul habarlamada aıtylǵanyndaı, «KEGOC» AQ atyna quqyq qorǵaý organdarynan osy oqıǵaǵa oraı kompanııa qyzmetkerlerine qatysty qylmystyq is qozǵaý týraly aqparat kelmegen.
Al kompanııanyń órt bolǵan jerdegi 500 kV-tyq EEK - Rýbtsovsk 5527 áýe jelisi ótetin aımaqty zertteý barysynda jelide bolǵan qysqa tuıyqtalý órttiń tutanýyna sebep bolmaǵandyǵyn aıǵaqtady. Dıspetcherlik ortalyqtyń jedel aqparaty da soǵan saıady.
Degenmen, órt shyǵýynyń sebepteri týraly túkpilikti qorytyndyny táýelsiz komıssııa shyǵarmaq. Al «KEGOC» kompanııasy bolsa, BAQ ókilderimen tyǵyz baılanys ornatyp, barlyq qajetti málimetterdi usynýǵa daıyn ekendikterin málim etti.
