Pavlodar oblysyndaǵy egistikterde jumys qarqyndy júrýde
PAVLODAR. QazAqparat - Pavlodar oblysynyń ákimi Bolat Baqaýov jumys saparymen Sharbaqty aýdanyna baryp qaıtty, dep habarlaıdy QazAqparat oblys ákiminiń baspasóz qyzmetine silteme jasap.
Birinshi kezekte Bolat Baqaýov Aleksandrovka tirek aýylyna bardy. Bul jerde ákim aýyl ishindegi joldardyń jóndelý barysyn tekserip, ortalyqtandyrylǵan sý jelisiniń tartylýyn baqylady. Osyǵan deıin aýylda sý qubyry eshqashan bolǵan joq. Turǵyndar shahta qudyqtarynan sý alyp júrdi. Sonymen qatar aımaq basshysy osy jyly salynǵan tıptik veterınarlyq pýnktine kirip shyqty.
Ákimge berilgen aqparat boıynsha oblystyń 5 aýdanynda jalpy somasy 320 mln teńgeni quraıtyn 20 jańa vetpýnkt paıdalanýǵa berildi. Onda veterınarlyq qyzmetke qajetti zattardyń barlyǵy bar, sonyń ishinde qajetti bólmeler men avtokólikke arnalǵan garaj da qarastyrylǵan.
«Veterınar júıeli túrde árbir úıdi aralap shyǵýy kerek. Sebebi maldyń bári baqylaýda bolýy tıis. Búgingi kúni Aýyl sharýashylyǵy mınıstrligi etti mal sharýashylyǵyn damytý boıynsha úlken baǵdarlamany júzege asyryp keledi. Sol sebepti, keleńsiz jaǵdaılardyń aldyn alý maqsatynda biz shetelden ákelgen maldy joǵary deńgeıde kútip ustaýymyz kerek», - dedi Bolat Baqaýov.
Sonymen qatar Bolat Baqaýov Orlovka aýylynda boldy. Osynda ol «Pobeda» JShS basshysynyń bastamasymen ashylǵan dýaldy bilim berý ortalyǵyna bardy. Osy ortalyqta kolledj jáne JOO stýdentteri aýyl sharýashylyǵynda jumys isteýge úırenip, praktıkadan óte alady.
«Biz árdaıym jastarmen jumys isteýge tyrysamyz. Egin jınaý naýqany men kásiporynnyń basqa da jumystaryna 28 stýdent jumyldyrylǵan. Solardyń qatarynda Sharbaqty kolledjiniń stýdentteri de bar. Egistiktegi jumystarǵa jergilikti mekteptiń joǵary synyp oqýshylary da shaqyrylady. Praktıka úshin balalar jalaqylaryn alady», - deıdi «Pobeda» JShS basshysy Aleksandr Polıakov.
«Egistikte jumys isteýdi maǵan ákem úıretti, sondyqtan «Pobeda» JShS-na praktıkaǵa birtalaı daǵdylarmen keldim. Meniń jumys kúnim saǵat 11-de bastalyp, saǵat keshki 5-te aıaqtalady. Osynda jumys isteýdiń arqasynda bıdaıdy ósirip, jınaýdyń ońaı emes ekenin túsinesiń», - dedi on birinshi synyp oqýshysy Aleksandr Shıl.
Sharbaqty aýdanynda aımaq basshysy jergilikti polıtsııa qyzmetiniń jumysyna baılanysty jınalys ótkizdi. Ol JPQ qyzmetkeriniń eń aldymen ózderi jaýap beretin ýchaskelerde bolyp, jergilikti turǵyndardyń máselelerin sheshýge mindetti ekenderin esterine saldy.
