Pavlodar oblysyndaǵy Aqtoǵaıda sý sapasyna qatysty jaǵdaı turaqtaldy

PAVLODAR. QazAqparat - Aqtoǵaı aýylyndaǵy qubyr sýy quramynan qorǵasyn tabylǵan joq. Bul týraly Pavlodar oblysy tutynýshylar quqyǵyn qorǵaý departamentiniń baspasóz qyzmeti taratqan habarlamada kórsetilgen.

Esterińizde bolsa, josparly sý sapasyn baqylaý barysynda «Ulttyq saraptama ortalyǵy» ShJQ  Pavlodar oblystyq fılıaly RMM zerthanasy 8-9 qazan kúnderi Aqtoǵaı aýylynyń sý qubyrynan alǵan synamalardan qorǵasyn kórsetkishiniń shamadan tys kóp ekendigin anyqtady.

«Nátıjeni rastaý úshin sý synamalary «Qazgıdromet» táýelsiz zerthanalaryna jáne Pavlodar q. ekologııa departamentine,  «Pavlodargıdrogeologııaǵa» (Qaraǵandy q. «Azımýt Geologııa» JShS),  «Kaztsınk» AQ jáne Óskemen qalasyna, Tutynýshylardyń quqyqtaryn qorǵaý komıteti «Ulttyq saraptama ortalyǵy» ShJQ Shyǵys Qazaqstan oblystyq fılıaly RMM-na jiberildi», - dep habarlady tutynýshylardyń quqyqtaryn qorǵaý departamenti basshysynyń orynbasary Irına Sorokına.

Zertteý júrgizilgen ýaqytta Aqtoǵaıdaǵy sý qubyry ajyratylyp, aýyl turǵyndaryna tsısternamen sý jetkizildi.

«Joǵaryda atap kórsetilgen zerthanalar sý synamalarynan shamadan tys qorǵasyn tapqan joq, - dedi I.Sorokına. - Sonymen birge, Ertis ózeni men jaqyn ornalasqan eldimekenderdiń sýyna da saraptama jasaldy, ondaǵy sý kórsetkishteri de sanıtarlyq talaptarǵa saı bolyp shyqty».

Búginde sý sapasy jaǵdaıy turaqtaldy. Aqtoǵaı aýylyndaǵy sý belgilengen gıgıenalyq normatıvterge saı jáne ishýge jaramdy.

Aqtoǵaı aýylyndaǵy qubyr sýy sapasyna kúndelikti baqylaý bekitildi.