Pavlodar oblysyndaǵy Aqtoǵaı aýdanynda on aýyl sharýashylyǵy kooperatıvi qurylmaq
ASTANA. QazAqparat - Bıyl aqtoǵaılyq sharýalar birlesip onnan astam aýyl sharýashylyǵy kooperatıvin qurýdy josparlap otyr, dep habarlaıdy pavlodarnews.kz .
Aýdan ákimi Aǵybaı Ámirınniń aıtýynsha, byltyr eki aýyl sharýashylyǵy kooperatıvi qurylǵan. Onyń biri - sút, ekinshisi - et baǵytynda jumys isteýde. Bıyl mundaı birlestikter sanyn onnan asyrý josparlanyp otyr. Oǵan aýdan kásipkerleriniń áleýeti jetedi. Agrarlyq alqaptar da oǵan daıyn. Birlesip jumys isteýge qulshynyp otyrǵan sharýalar da barshylyq. Sondyqtan osy múmkindikti tıimdi paıdalanýymyz kerek. «Elbasy júktegen tapsyrmalardyń biri - sýarmaly alqaptyń kólemin ulǵaıtý.ıAǵnı, bes jyl ishinde sýarmaly egin alqabyn 40 paıyzǵa molaıtyp, Qazaqstan boıynsha 2 mln. sharshy metr alqapty osyndaı tásilmen ıgerý kerek degen tapsyrma berdi. Aqtoǵaı aýdanynda 2016 jyly sýarmaly sharýashylyqtyń kólemi 2400 gektar bolǵan. Osy jyly oǵan taǵy 500 gektar qosý kózdelip otyr. Qazirgi kúni dıqandarmen osy baǵytta jumys júrgizilýde», - deıdi Aǵybaı Ámirın.
Aqtoǵaı aýdanynda byltyr qurylǵan eki aýyl sharýashylyǵy kooperatıviniń biri - Áýelbek eldi mekenine ornalasqan. Aýyldyń úsh azamaty birigip «Ádilet-Aqtoǵaı» degen kooperatıv quryp, sút qabyldaýmen aınalysýda. Aýyl turǵyndarynan kúnine 300 lıtr sút qabyldanýda. Jazǵy ýaqytta olar bir tonnaǵa jetkizýdi kózdep otyr. «Aldaǵy ýaqytta aýyl sharýashylyǵyn qoldaý qorynan jeńildetilgen nesıe alyp, arnaıy jeke ǵımarat salýdy jáne onshaqty súttiń sıyryn alýdy josparlap otyrmyz. Pavlodar qalasyndaǵy «Foodmaster» JShS-men kelisimshart jasastyq. Kompanııanyń ókilderi úsh kún saıyn kelip, jınalǵan sútti quıyp alyp ketedi. Sút salqyndatqysh ydysty da sol kompanııa arqyly jalǵa alyp otyrmyz. Jalpy, kooperatıvke birlesip jumys isteýdiń paıdasyn mol ekenine kózimiz jetti. Birimizde joqty ekinshi múshemiz tolyqtyryp qoıady. Buǵan deıin turaqty kásip joq bolǵandyqtan, jumys izdep qalaǵa shabylatyn edik. Memlekettik qoldaýdyń arqasynda ózimizdi ózimiz jumyspen qamtyp otyrmyz», - deıdi kooperatıv jetekshisi Qaırat Salyqbaev.
