Pavlodar oblysyndaǵy 747 uıymda komplaın-qyzmet engizildi

NUR-SULTAN. QazAqparat – Pavlodar oblysynyń 747 uıymynda keshendi komplaın-qyzmet engizildi. Bul týraly Sybaılas jemqorlyqqa qarsy is-qımyl agenttiginiń Pavlodar oblysy boıynsha departament basshysynyń mindetin atqarýshy Ardaq Balǵojın aıtty, dep habarlaıdy QazAqparat tilshisi.

«Memlekettik satyp alýlarǵa monıtorıng júrgizilip otyr. Nátıjesinde 643 mıllıon teńge únemdeldi. Sondaı-aq, keshendi komplaın-qyzmet engizip jatyrmyz. Kvazımemlekettik sektordyń 747 sýbektisi men vedomstvolyq baǵynysty uıymdarynda biz osy qyzmetti engizdik. Sondaı-aq, Protecting Business and Investments jobasy aıasynda byrqatar is tyndyrylyp, 52 kelisimge qol qoıyldy. Bul jobalardyń jalpy ınvestıtsııalyq quny shamamen 500 mıllıard teńgedeı bolady. «Atameken» Ulttyq kásipkerler palatasymen únemi kezdesip, shaǵymdary men usynystaryn qarastyramyz», - dedi Ardaq Balǵojın ANTIKOR aqparat alańynda.

Sondaı-aq, ol memlekettik organ ókilderiniń bızneske orynsyz kıligýine shaǵymdanyshýylar kóp ekenin atady.

«Sáýlet bóliminiń laýazymdy tulǵalary bir kásipkerdiń óndiristik qyzmetine orynsyz aralaspaq bolǵan. Biz shaǵymdanýshynyń quqyǵyn qorǵap qaldyq. Al soǵan jol bergen laýazymdy tulǵalar Ákimshilik quqyq buzýshylyq týraly kodekstiń 154-baby boıynsha jazaǵa tartyldy», - dedi departament ókili.

Ardaq Balǵojınniń aıtýynsha, departament buryn sybaılas jemqorlyq qylmys jasaǵan tulǵalar boıynsha monıtorıng júrgizgen.

«Oblystyń qalalary men aýdan ákimderin qosa alǵanda, basshylyq quramy boıynsha olardyń sybaılas jemqorlyqqa qarsy mádenıetti qalyptastyrý jáne óz qaramaǵyndaǵy qyzmetkerler arasynda sybaılas jemqorlyqtyń kez kelgen kórinisterine tózbeýshilik saıasatyn júrgizý mánine keshendi monıtorıng júrgizildi. Monıtorıng qorytyndysy agenttik basshylyǵy men oblys ákimine joldandy. Sondaı-aq, aýyl sharýashylyǵy salasynda aldyn ala monıtorıng júrgizildi», - dedi sybaılas jemqorlyqqa qarsy qyzmet ókili.