Pavlodar oblysynda jyl basynan beri eki bala menıngıtpen aýyrǵan
PAVLODAR. QazAqparat - 2018 jyldyń basynan beri Pavlodar oblysynyń eresek turǵyndary arasynda menıngokokk ınfektsııasyn juqtyrǵandar tirkelmegen, esesine eki bala osy aýrýmen aýyrǵany belgili boldy, dep habarlaıdy QazAqparat tilshisi.
«Jyl basynan bergi bes aıda eki adamǵa menıngokokk ınfektsııasy juqqanyn bilemiz, onyń ekeýi de bala. Biri qańtarda, ekinshisi mamyr aıynda aýyrdy. Olar aýrýdan aıyǵyp ketti», - deıdi Pavlodar oblystyq qoǵamdyq densaýlyq saqtaý departamentiniń basshysy Irına Sorokına QazAqparat tilshisine bergen suhbatynda.
I. Sorokınanyń sózine qaraǵanda, bul eki jaǵdaıdyń bir-birimen eshqandaı qatysy joq. Olarmen jaqyn qarym-qatynasta bolǵan adamdardyń barlyǵy tekserilgen, eshkimge bul aýrý juqpaǵan. Aýrýynan aıyqqan balalar Pavlodarda turady.
Maman adamdardy osy aýrýǵa tekserý úshin óńirde búkil jaǵdaı jasalǵanyn aıtady. «Juqpaly aýrýlar aýrýhanasy saqadaı saı tur, biz mundaı jaǵdaılarǵa daıynbyz», - deıdi Irına Sorokına.
Onyń aıtýynsha, ınfektsııany anyqtaý úshin aldymen ýlaný (ıntoksıkatsııa) sımptomdaryna: adamnyń ystyǵynyń kóterilýine, bastyń aýyrýyna mán berý qajet. Naýqas adamnyń denesine bórtpeler shyǵyp, qusýy múmkin.
«Denesinde tipti bir-eki bórtpe paıda bolsa da ýaqyt ozdyrmaı dárigerge júginý qajet. Menıngokokk ınfektsııasy juqqan kezde eń bastysy - dárigerge der kezinde qaraný qajet», - deıdi ol.
