Pavlodar oblysynda jyl basynan beri 17 bala joǵalyp ketken
PAVLODAR. QazAqparat – Pavlodar oblysynda jyl basynan beri joǵalǵan 17 balanyń 14-in tártip saqshylary sol kúni izdep tapsa, qalǵanyn úsh táýlik ishinde tapqan, dep habarlaıdy QazAqparat tilshisi.
«Bıylǵy jyldyń basynan beri Pavlodar oblysynyń Polıtsııa departamentine kámelet jasyna tolmaǵan balalardy izdeý boıynsha 17 habarlama kelip túsken. Onyń 14-i olardyń joǵalǵany týraly kelip túsken habarlamadan keıin alǵashqy táýlikter ishinde tabylsa, qalǵan úsheýin tártip saqshylary úsh kún ishinde tapqan», - dedi Palodar oblysy Polıtsııa departamentinen.
Tártip saqshylarynyń aıtýynsha, naýryz aıynda 2014 jáne 2015 jyly týǵan eki kishkentaı qyz ata-analarymen bolǵan janjaldan keıin úıden ketip qalyp, qaıta oralmaǵany polıtsııaǵa habarlandy. Alǵashqy eki kún boıy ata-anasy balalardy ózdiginen izdegen, olardy taba almaǵandyqtan polıtsııaǵa júgingen.
«Departamenttiń jeke quramy dereý jınaldy. Polıtsııa qyzmetkerleri jaqyn mańdaǵy úılerdiń barlyq kireberisterin, balalar alańdaryn tekserdi, olardyń qurbylarymen suhbattasty. Polıtseıler kámeletke tolmaǵandardy qala aýlalarynyń birinen tapty», - dep habarlady departamentten.
Polıtseılerdiń aıtýynsha, óz erkimen ketken kámeletke tolmaǵan balany izdeý kezinde tek dostary men tanystarynyń telefondaryna habarlasýmen, aýla aýmaǵyn aınalyp ótýmen shektelýge bolmaıdy.
«Eger sizdiń balańyz túnde úıge oralmasa jáne onyń ornalasqan jerin óz betinshe anyqtaý múmkin bolmasa, dereý polıtsııaǵa habarlasyńyz. Joǵalǵan sátten bastap úsh kún ótkenshe kútýdiń ıa bolmasa bir-eki kúnnen keıin balanyń ózi sizge qońyraý shalady dep kútip, úmittenýdiń qajeti joq», - dep atap ótti quqyq qorǵaý organdary.
Avtor: Anton Gagarın
