Pavlodar oblysynda jyl bastalǵaly 30 mas júrgizýshi ustaldy
PAVLODAR. QazAqparat – Pavlodar oblysynda jyl basynan beri mas kúıinde kólik aıdaǵan 30 júrgizýshi ustaldy, olardyń kópshiligi birinshi ret quqyq buzyp turǵan joq, dep habarlaıdy QazAqparat tilshisi.
«2020 jyl bastalǵaly beri polıtsııa qyzmetkerleri mas kúıinde kólik aıdaǵan 30-dan asa júrgizýshini ustady jáne olardyń kópshiligi ishimdik ishken kúıinde qaıtadan kólik aıdaıdy», - dep málimdedi Pavlodar oblystyq polıtsııa departamenti.
Mekemedegiler olardyń tórteýiniń ústinen qylmystyq is qozǵalǵanyn aıtty.
«5 qańtar kúni Aqtoǵaı aýyldyq patrýldik polıtsııa rotasy alkogoldik ishimdik iship «Audi-80» markaly kólikti aıdaǵan 43 jastaǵy jergilikti turǵyndy ustady», - dep habarlady departamenttiń baspasóz qyzmeti tilshilerge.
«2 qańtar kúni Aqsý qalasynyń polıtseıleri Lenın kóshesinde 51 jastaǵy azamat rýlinde bolǵan «Volkswagen Golf» avtokóligin toqtatqan. Medıtsına qyzmetkerleri júrgizýshiniń alkogoldik ishimdik ishkenin rastady», - dep taǵy da bir mysal keltirdi tártip saqshylary.
Atap óteıik, 2019 jyldyń 30 jeltoqsanynda Memleket basshysy Qasym-Jomart Toqaev «Qazaqstan Respýblıkasynyń keıbir zańnamalyq aktilerine qylmystyq, qylmystyq-protsestik zańnamany jetildirý jáne jeke adam quqyqtarynyń qorǵalýyn kúsheıtý máseleleri boıynsha ózgerister men tolyqtyrýlar engizý týraly» Qazaqstan Respýblıkasynyń Zańyna qol qoıdy. Ol jaýapkershilikti kúsheıtýge arnalǵan, onyń ishinde mas kúıinde kólik aıdaý da bar.
