Pavlodar oblysynda júkti áıeldi ákele jatqan jedel járdem qar qursaýynda qalǵan
PAVLODAR. QazAqparat - Tórtqudyq aýylynan Ekibastuz qalasyna baǵyt alǵan jedel járdem kóligi Shiderti kentinen 20 shaqyrym jerde tasjolda qar qursaýynda qalǵan, dep habarlaıdy pavlodarnews.kz.
Oblystyq TJ departamenti baspasóz qyzmetiniń málimdeýinshe, Ekibastuz óńiriniń qutqarýshylar pýltine búgin, 23 qańtarǵa qaraǵan túni saǵat 04:00 shamasynda 40 apta júktilik merzimindegi áıeldi ákele jatqan jedel járdem kóligi qar qursaýynda qalyp qoıǵandyǵy týraly habarlama túsken. - Oqıǵa ornyna kómek kórsetý úshin jedel túrde «Trekol» jol talǵamaıtyn kólik quralymen 2 qutqarýshysy bar jedel qutqarý jasaǵynyń kezekshi aýysymy jiberildi, - dedi departamentte. - Sondaı-aq ekinshi jedel járdem kóligi shyqty. Alaıda ol qaladan 15 shaqyrym qashyqtyqta qar qursaýynda qalyp qoıdy. Qutqarýshylar 2 medıtsınalyq qyzmetker men jolda turyp qalǵan avtokólikten eki adamdy, ıaǵnı, bosanatyn áıeldi jubaıymen birge qar qursaýynan alyp shyqty. Jedel-qutqarý jasaǵy saǵat 06:36-da Ekibastuz qalasynan 15 shaqyrym jerde ornalasqan emdeý mekemesine tasymaldaý úshin kútip turǵan jedel járdem kóligine jolaýshylardy alyp bardy.
