Pavlodar oblysynda júk kóliginiń júrgizýshisi kópirdi qulatyp ketti
PAVLODAR. QazAqparat – Pavlodar oblysynda júk kóligi kópirdiń tiregin buzyp, qurylymnyń bir bóligi kóliktiń ústine qulady, dep habarlaıdy QazAqparat tilshisi.
Foto: @pvl_times
«Oqıǵa ornyna kelgen polıtseıler saǵat 22:20-da 42 jastaǵy «Shacman» markaly kóliktiń júrgizýshisi Pavlodarǵa qaraı tasjolmen kele jatyp, kólik qozǵalysynyń qaýipsizdigine kóz jetkizbeı, kýzovymen kópirdiń tiregin soqqan. Oqıǵa saldarynan kópirdiń bir bóligi qırady», - dep habarlady Pavlodar oblystyq polıtsııa departamentiniń baspasóz qyzmeti.
Pavlodar-Qyzylorda tasjolynyń 42-shi shaqyrymynda bolǵan jol-kólik oqıǵasy týraly habar Aqsý qalalyq kezekshilik bólimine 23 tamyz kúni keshki saǵat 22:46-da túsken.
«Anyqtalǵandaı, budan buryn júrgizýshi Shekarashy aýylynda salynyp jatqan kópir mańynda qum túsirgen. Keıin kólik quralynyń kýzovyn túsirmeı, jolǵa shyǵyp ketken», - dedi departamenttiń baspasóz hatshysy Janna Belıalova.
Apat saldarynan eshkim zardap shekken joq. Medıtsınalyq qorytyndy boıynsha, júrgizýshi mas bolmaǵan.
«Atalǵan fakti boıyna júrgizýshiniń ústinen QR Ákimshilik quqyq buzýshylyq týraly kodekstiń 610-baby «Kólik júrgizýshileriniń jol júrisi qaǵıdalaryn adamdardyń densaýlyǵyna zııan keltirýge, kólik quraldarynyń nemese ózge de múliktiń búlinýine alyp kelgen buzýshylyǵy» boıynsha ákimshilik óndiris qozǵaldy. Materıal sotqa jiberildi», - dep atap ótti polıtsııa.
Avtor: Anton Gagarın
Foto: @pvl_times
