Pavlodar oblysynda júk kóligi bir tabyn sıyrdy basyp ketti
PAVLODAR. QazAqparat - KamAZ júrgizýshisi Omby - Maıqapshaǵaı kúre jolyn kesip ótip jatqan sıyr tabynynyń aldynan óte shyqpaq bolǵanda úlgere almaı, on bir maldy basyp ketti, dep habarlaıdy QazAqparat tilshisi.
«KamAZ avtokóliginiń júrgizýshisi «Mal ótetin jer» jol belgisiniń aımaǵynda sıyrlardy basyp ketken. Odan Qyzyltań aýyly turǵyndarynyń on bir iri qarasyna zaqym kelgen», - dep málimdedi Pavlodar oblystyq ishki ister departamentiniń baspasóz qyzmeti.
Júrgizýshiniń ózi joldy kesip ótip jatqan maldy kórgenin moıyndady. Biraq ol jyldamyraq júrip, olardyń aldynan óte shyqpaq bolǵan.
«Osy derek boıynsha, júrgizýshige qatysty ákimshilik materıal toltyryldy», - deıdi ІІD ókilderi.
Anyqtalýynsha, oqys oqıǵadan aman qalǵan sıyrlar soıysqa jiberiledi.
