Pavlodar oblysynda jolda qalǵan Tájikstan júrgizýshileri qutqaryldy
PAVLODAR. QazAqparat - Aýa temperatýrasynyń qatty tómendeýine baılanysty Pavlodar-Qyzylorda trassasynda Tájikstan júrgizýshileriniń avtokólikterinde dızel otyny qatyp qalǵan, dep habarlaıdy QazAqparat Pavlodarnews.kz saıtyna silteme jasap.
Oblystyq polıtsııa departamentiniń málimetinshe, Pogranıchnık aýylynyń janyndaǵy «Pavlodar-Qyzylorda» trassasyn patrýldeý kezinde Qalqaman aýylynyń polıtsııa bóliminiń qyzmetkerleri kapıtan Narıman Aronov pen polıtsııa serjanty Mahadı Terlýev jol jıeginde turǵan «Mersedes» júk kóligin baıqaǵan. Júk kóliginiń júrgizýshisi seriktesimen birge Reseı Federatsııasynyń Barnaýyl qalasynan Tájikstan Respýblıkasyna kele jatqanyn aıtqan.
- Aýa temperatýrasynyń -30 gradýsqa deıin qatty tómendeýine baılanysty avtokólikte dızel otyny qatyp qalǵan. Júrgizýshiler aqaýdy óz betinshe joıa almaı, kólikte tońyp qalǵan. Qosymsha aıdap ákelingen tehnıkanyń arqasynda júk kóligi Qalqaman aýylyna jetkizildi. Onda júrgizýshilerge tamaq, jyly monsha jáne túneý úshin oryn berildi, - dedi departamentte.
Kelesi kúni tártip saqshylary qysqy dızel otynyn taýyp, kólikti jylytyp, reıske daıyndaý úshin birshama jumystar atqardy.
Rıza bolǵan saıahatshylar polıtseılerge kásibıligi jáne qıyn jaǵdaıda kómek kórsetkeni úshin rızashylyqtaryn bildiredi.
- Polıtsııa qyzmetkerlerine osy apatta bizdi jalǵyz qaldyrmaǵany úshin rahmet. Óte qatty aıazda olar ótip ketpeı, bizge kómektesti jáne panalaryna aldy. Osyndaı jaýapty, naǵyz polıtseıler bar ekenine óte qýanyshtymyn. Men barlyq rızashylyǵymdy sózben jetkize almaımyn, - deıdi júk kóliginiń ıesi Mýhammaddjon Normýhammadov.
