Pavlodar oblysynda jol erejesin buzǵan 21 myńnan astam júrgizýshi anyqtaldy
Oblystyq polıtsııa departamentiniń baspasóz qyzmetiniń málimdeýinshe, jol erejesin buzý faktisi «Redspeed», «Integra-KDQ» JQBIJ, «Avtoýragan» ABK júıeleri arqyly anyqtalǵan.
Jalpy, jol qaýipsizdigin qamtamasyz etý úshin oblys ortalyǵyndaǵy kóshelerde jol qozǵalysy erejelerin buzǵan júrgizýshilerdi anyqtaıtyn 41 avtomatty júıe ornatylǵan. Bul júıeler tek jyldamdyq rejımin ǵana emes, baǵdarshamnyń tyıym salynǵan túsine ótý men jol belgilerin buzýdy baqylaýǵa jáne tirkeýge qabiletti. Sonymen qatar, júıeler kólik quraldarynyń memlekettik tirkeý nómirlerin oqyp, tanıdy. Joldardaǵy buzýshylyqtardyń beınejazbasyn ártúrli buryshtardan túsirip, olardy ortalyq serverge jibere alady.
«Aǵymdaǵy jyldyń 6 aıynda Pavlodar qalasynda «Redspeed», «Integra-KDQ» JQBIJ, «Avtoýragan» ABK júıelerimen 21 449 jol qozǵalysy erejelerin buzý anyqtaldy. Jol erejesin buzǵandar 277 mln.999 myń 275 teńge somasynda aıyppul salý týraly uıǵarymdar jazyldy», - dedi oblystyq PD ákimshilik polıtsııa basqarmasynyń bastyǵy Borıs Álimbaev.
Tártip buzǵan júrgizýshilerge nusqamalar turǵylyqty jeri boıynsha «Qazposhta» AQ arqyly jiberiledi. Jiberilgen nusqamalar boıynsha 241 mln teńgege jýyq aıyppul tólendi. Sonymen qatar, jyl basynan beri jumys orny boıynsha májbúrlep oryndaý úshin 13 mln teńge somasyna 1000-nan astam uıǵarym jiberildi.
Budan bólek, sot oryndaýshylaryna shamamen 32 mln teńge somaǵa 1000-ǵa jýyq uıǵarym jiberilgen.