Pavlodar oblysynda jol apatynan zardap shekken birneshe adamǵa kómek kórsetildi
PAVLODAR. QazAqparat - Oblystyq apattar medıtsınasy ortalyǵynyń «Qalqaman» trassalyq medıtsınalyq-qutqarý beketiniń qyzmetkerleri jol-kólik apatyna ushyraǵandarǵa kómektesti, dep habarlaıdy pavlodarnews.kz.
Oblystyq TJD baspasóz qyzmetiniń málimdeýinshe, keshe, 1 shilde kúni saǵat on birde biryńǵaı dıspetcherlik pýltine Qyzylorda - Pavlodar avtojolyndaǵy Tórtqudyq aýylynyń mańynda kólik apatynyń oryn alǵandyǵy týraly habarlama túsken.
- Jeńil kóliktiń júrgizýshisi rýlden aıyrylyp qalyp, joldan shyǵyp ketken, - deıdi departamentte. - Kóliktiń ishinde júrgizýshimen birge onyń áıeli jáne eki jasar uly bolǵan. Apattyń saldarynan 1989 jyly týǵan er adam mańdaıyn jaraqattap, mıy shaıqalǵan. Onyń zaıyby da jabyq mı jaraqatyn alyp, mańdaıyn jaralaǵan. Sonymen birge, áıel adamnyń oń jaq buǵanasy synǵan. Eki jasar ul balanyń ómiri men densaýlyǵyna eshbir qaýip tóngen joq.
Oqıǵa ornyna jetken qutqarý beketiniń mamandary zardap shekkenderge jedel medıtsınalyq kómek kórsetti. Áıel adam oblys ortalyǵyna jetkizilip, №1 qalalyq aýrýhanaǵa jatqyzyldy.
Taǵy bir jol-kólik apaty Omby - Maıqapshaǵaı avtojolyndaǵy Áýelbek aýylynyń janynda oryn aldy. Bul týraly habar «112» telefon nómirine keshe saǵat 15:35-te kelip tústi. Zardap shekkenderge apattar medıtsınasy ortalyǵynyń kómegi qajet bolǵan joq. Kóliktiń tórt jolaýshysy, onyń ishinde úsh bala jolshybaı mashınamen Aqtoǵaı aýdandyq aýrýhanasyna jetkizildi. Taǵy bir zardap shegýshige Áýelbek aýyldyq ambýlatorııasynyń dárigeri jedel medıtsınalyq kómek kórsetti.
