Pavlodar oblysynda jol apatynan úsh adam aýrýhanaǵa tústi
PAVLODAR. QazAqparat – Maıqaıyńda «Lada Prıora» markaly avtokólik jaıaý júrginshini qaǵyp, baǵanaǵa baryp soǵyldy, dep habarlaıdy QazAqparat tilshisi.
«Altynshy jeltoqsan kúni saǵat 23:50-de Baıanaýyl aýdany Maıqaıyń aýylynda «Lada Prıora» avtokóliginiń 21 jastaǵy júrgizýshisi rýldi ıgere almaı jaıaý júrginshini qaǵyp, jaryqtandyrý baǵanyna soǵysqan. Jol apaty kezinde jaıaý júrginshi men eki jolaýshy túrli jaraqat alyp, aýrýhanaǵa jatqyzyldy», - dep habarlady tilshilerge Pavlodar oblystyq Polıtsııa departamentiniń baspasóz qyzmeti.
«Jol-kólik oqıǵasy kezinde júrgizýshi saý bolǵan, kólik aıyp turaǵyna qoıyldy. Tekserý júrip jatyr»,-delingen habarlamada.
