Pavlodar oblysynda jol apatynan eki zeınetker mert boldy
«14 qarasha saǵat 10:40-ta Pavlodar-Ýspenka-RF shekarasy tasjolynyń 72 shaqyrymynda «VAZ 21074» markaly avtokóliginiń taıǵaq jolda jyldamdyqty saqtamaǵan 70 jastaǵy júrgizýshisi «Folksvagen Passat» kóligimen soqtyǵysty. Jol-kólik oqıǵasy saldarynan «VAZ 21074» kóliginiń júrgizýshisi men 70 jastaǵy jolaýshysy alǵan jaraqaty saldarynan mert boldy», - dedi Pavlodar oblystyq polıtsııa departamentiniń baspasóz qyzmetinen.
«Folksvagen Passat» avtomobıliniń 49 jastaǵy júrgizýshisi men 19 jastaǵy jolaýshysy túrli jaraqatpen aýrýhanaǵa tústi.
QR QK 345-baby 4-bóligi boıynsha sotqa deıingi tergeý bastaldy. Kólikter arnaıy aıyppul turaǵyna qoıyldy.
«Jol apatynyń taǵy bir sebebi - «Qazavtojol» JShS-nyń qar tazalaýdy durys uıymdastyrmaýy bolýy múmkin. Sotqa deıingi tergeý aıasynda osy tasjoldy qadaǵalaıtyn uıymdy jaýapqa tartý máselesi de qarastyrylyp jatyr», - dedi vedomstvodan.
Avtory: Anton Gagarın